Redaksıamyzǵa búgin Shoqan Ýálıhanov atyndaǵy Kókshetaý memlekettik ýnıversıtetiniń daıyndyq bóliminiń ádiskeri Dıana Qurmanova habarlasty. Ol atalmysh ýnıversıtette daıyndyq kýrsynda oqyp júrgen Fatıha Mamytaqyn esimdi Qytaı azamatshasynyń máselesimen habarlasty. Qytaı elinde týyp-ósken qazaq qyzynyń vızasy 2017 jyldyń 20-shy qańtarynda bitken eken. Alaıda qańtardyń 11-i kúni vıza ýaqyty 20-shy qańtarda bitetini eskertilgen. Vızany uzartý úshin Kókshetaý qalasynyń kóshi-qon departamentinde zań boıynsha 30 AEK, ıaǵnı 68 myń teńge tóleý kerektigin aıtqan.
«Fatıha Mamytaqyn atty tyńdaýshymyz vızasyn uzartý úshin 68 myń teńge tóleý kerektigin, alaıda ondaı aqshasy joq ekenin aıtyp kómek surady. Biz óz tarapymyzdan Kókshetaý qalasynyń kóshi-qon basqarmasyna ótinish hat jazdyq. Shoqan Ýálıhanov atyndaǵy Kókshetaý memlekettik ýnıversıtetiniń prorektory Fatıha Mamytaqynmen birge ótinish hatty alyp bardy. Alaıda onda kóp retti vızany alý úshin 68 myń teńgeni zań boıynsha tóleý kerektigin jáne zańǵa qarsy kele almaıtynyn aıtyp, shyǵaryp salǵan. Osydan keıin atalmysh sommanyń jartysyn ýnıversıtet qyzmetkerleri jınap berdi, qalǵanyn Fatıha Mamytaqynnyń ózi tóledi. Alaıda, dál osyndaı jaǵdaıda vızany tegin uzartqan tyńdaýshynyń bar ekenin estidik. Sondyqtan, máseleniń anyq-qanyǵyn anyqtap, 68 myń teńgeni qaıtaryp alýyna kómektesseńizder» dedi Dıana Qurmanova.
Osydan keıin redaksıa tilshileri kóshi-qon polısıasyna habarlasyp, Qazaqstanǵa oqýǵa kelgen sheteldik qazaqtarǵa vıza tegin uzartylatynyn anyqtady.
«Zań boıynsha ulty qazaq sheteldik azamattarǵa vıza tegin uzartylady. Ol úshin kýáliginde ulty qazaq dep kórsetilse bolǵany. Al bilmestikpen 68 myń teńge tólegen jaǵdaıda, kóshi-qon basqarmasyna baryp, «Túbirtek qoldanylmady» degen anyqtama alady. Onymen salyq departamentine barýy qajet. Sol kezde aqshasy qaıtarylyp beriledi» dedi SQO oblysynyń aǵa ınspektory Rashıd Júsipbekov.
Iaǵnı zań boıynsha tegin uzartylýy tıis vızany Fatıha Mamytaqyn 68 myń tólep alǵan. Eger «Qamshyǵa» habarlaspaǵan jaǵdaıda, bálkim atalmysh zań týrasynda bilmes pe edi. Bilmestikpen qansha qandasymyz 68 myń teńgesin jelge ushyrǵany belgisiz. Bul rette kóshi-qon basqarmasy qyzmetkerleriniń salǵyrttyǵynda ekenin atap ótý kerek.
Biz Kókshetaýdyń kóshi-qon basqarmasyna habarlastyq. Aqnur esimdi qyzmetker atalmysh zańdy bilmegenderin jáne tólem jasalyp bolǵannan keıin ǵana basqarmaǵa sheteldik qazaqtarǵa vıza tegin uzartylatynyn aıtty dep aqtaldy. Alaıda Fatıha Mamytaqynnyń 68 myń teńgesin qaıtaryp alýyna kómektesetinin jáne osy isti aıaǵyna deıin jetkizetinin habarlady.
«Qamshy» portaly osy isti aıaǵyna deıin nazarynda ustaıdy jáne Fatıha Mamytaqynnyń máselesi zańdy túrde oń sheshimin tabýyna at salysatyn bolady.
Qamshyger: Ásem Álmuhanbet
