Terıtorıa — árbir qazaq úshin qasıetti uǵym. Ol — etnıkalyq gen hám basty qundylyq.

 Memleket basshysy qazaq shekarasyn shegendep, BUU deńgeıinde bekitti de. Elimiz kórshilermen terıtorıalyq daýy joq birden-bir memleket.

Endi kúni keshe RF-ke qosylǵan Qyrymda jıyn ótip, Qazaqstannyń shekarasyna qatysty «qaterli» pikir aıtyldy. 

Reseı Memlekettik Dýmasynyń depýtaty Pavel Shperov  parlamenttik «dóńgelek ústel» otyrysynda RF quramyna «Qazaqstan jerin qosýǵa» ýáde beripti-mis:

—  Qazir kórshi memleketterdi ómir súrip jatqan orys ultynyń ókilderin – dıaspora dep ataımyz. Shyn mánisinde olar bizdiń otandastarymyz. Bar bolǵany shekara bólinisi kezinde ózge memlekettiń jerinde qalyp ketken jáne kez kelgen ýaqytta Reseı quramyna qaıta qosylýǵa daıyn. Bul ýaqytsha syrt memlekettiń enshisine ketken bizdiń jerimiz. Shekaralar máńgilik emes jáne biz Reseı memleketiniń shekarasyn qalpyna keltiremiz. Bul jaqyn ýaqytta oryn alady,-depti.

Bastapqyda biz buny — ýkraın aqparat alańynyń kezekti «ýtkasy» dep qabyldadyq. Keıin joǵarydaǵy «málimdemeniń» vıdeo jáne aýdıo nusqasy shyqqanda, alańdaı bastadyq. Sebebi vıdeo-aýdıofıksasıa — fakt. Demek bundaı málimdeme jasaldy. Sonda bul – Reseı parlamentiniń resmı pozısıasy ma? Jalpy, bul ne: málimdeme, fakt álde sandyraq?

Osy oımen biz RF Memlekettik dýmasynyń spıkeri Vácheslav Volodınge hat jazyp, joǵarydaǵy málimdemeniń aq-qarasyn anyqtap berýin suradyq. Tekserý júrgizip, Shperov qazaqstandyqtardan keshirim surasyn dep talap qoıdyq. Jaýap kóp kúttirmedi:

«Qaıyrly kún, Nurlyhan Qalqamanuly, Memlekettik dýmada mundaı ıdeıa eshqashan da kóterilgen emes. Parlament fraksıalarynda da, TMD isteri jáne halyqaralyq ister jónindegi profıldik komıtetterde de mundaı usynys jasalǵan emes.  Oǵan eshqandaı negiz joq. Shperovtyń sózi konteksten julynǵan, ol eki memleket arasyndaǵy shekarany qaıta qaraýdy usynǵan joq. Qazaqstan – Reseı úshin baýyrlas jáne jaqyn áriptes bolyp qala beredi». Senýge tyrystyq. Biraq qanaǵattanǵan joqpyz. Sondyqtan Memlekettik Dýmaǵa joldanǵan suraqty da, kelgen jaýapty da – Reseıdiń yqpaldy degen aqparat agenttikterine jiberdik. Máselen, «Regným» jáne «RIA Novostı» faktchekıng (fakt tekserý) júrgizip, rastalatyn bolsa, jelige jarıalaıtyndaryn jetkizdi. Tekserildi. Rastaldy. Aqpan aıynyń alǵashqy kúninde – profıldik «Parlamenttik gazetadan» bastap, barlyq aqparattyq agenttikter «málimdemeniń jalǵan» ekenin jetkizdi. Kelgen jaýapty biz nege Reseıdiń aqparattyq agenttikterine jiberdik degen suraq týyndaýy múmkin. Birinshiden – aýdıtorıa, ekinshiden – Reseıdiń resmı aqparat quraldary, al úshinshiden – endigári RF-te bolsyn, basqa jerde bolsyn bundaı «málimdemelerdiń» jasalýyn tyıý edi. İs osymen bitti degende, izinshe, «LDPR»-diń Qyrym bólimshesindegi resmı saıtynda Shperovtiń túsiniktemisi shyǵa kelsin. «Shyn aıttym»,-degendeı. Bir gram ókinish joq. Mássaǵan, bezgeldek!

Endi kelip, biz «LDPR» partıasynyń baspasóz hatshysy Anna Krylovaǵa habarlastyq. Anna hanym «LDPR» fraksıasynyń Memdýmadaǵy depýtaty Leonıd Edýardovıch (Slýskıı) BAQ-taǵy sózi – LDPR-diń pozısıasy ekenin, al Qyrym bólimshesindegi saıtta jarıalanǵan depýtat Shpervotyń pikiri LDPR partıasy Joǵarǵy Keńesiniń oıymen úndespeıtinin jetkizdi.

«Sonda Qyrym aımaqtyq bólimi LDPR partıasynyń Ortalyq apparatyna baǵynbastan, óz saıasatyn júrgize me?»-degen saýalymyzǵa Anna hanym jaýap tappaı qınaldy. Bar bolǵany: «Depýtat Slýskıı bárin aıtty. Osymen bul másele jabyldy»- dep jaýap berdi. Nonsens degenimiz osy! Slýskıı de, Shperov ta – Jırınovskıı qurǵan partıanyń ókilderi, bir fraksıanyń músheleri. Slýskıı myrza: «Shperovtiń sózi konteksten julynǵan, tolyqqandy jalǵan»,-dese, Shperov bolsa: «Men kez kelgen saýatty adam kelisetin pikirdi aıttym»-dep kósildi. Onyń óz partıasy: «Shperovtiń pikirin qoldamaımyz»,-dep otyr. Sonda Shperov onda ne istep otyr? Depýtattyq mandattan aıyrý qajet shyǵar?! Árıne, ol endi ishki máseleleri. Bir anyǵy, «LDPR»-dyń «terıtorıalyq ambısıalaryna» qatysty oılaryn reseılikterdiń 0,6 paıyzy ǵana qoldaıdy eken. Bul týraly RBK málimdegen. Ol partıanyń negizgi elektoraty – zeınetkerler. Shperov Qyrymda pensıa ala almaı otyrǵan zeınetkerlerge kómektesýdiń ornyna, aı qarap, shoshqa taǵalap, juldyz sanap júr.

Demal, dem al, Pavel! Núkte.

Nurlyhan QALQAMANULY,

Dýlat JALǴASPAIULY

Qaraǵandy.