Qazaqstan Respýblıkasynyń
Bas Prokýrory J.Asanovqa
Ashyq hat
Qurmetti Jaqyp Qajymanuly!
Men respýblıkalyq basylymnyń ardager jýrnalısi retinde Sizdi jaqsy bilemin. Munyń aldyndaǵy qyzmetterińizben halyq úshin atqarǵan ıgi isterińizge qanyqpyn. El ómiriniń tirshilik tynysyn tereń biletindigińizge Syr halqy rıza. Demek, elimizdiń Bas Prokýrory retinde qolǵa alyp jatqan jumystaryńyz buqaranyń kóńilinen shyǵý ústinde. Óıtkeni siz sala tizginin qolyńyzǵa ala salysymen barsha jurtty alańdatyp, biraq tıesili sheshimin túbegeıli tappaı júrgen ótkir máselelerdi oryndy kóterdińiz. Sóıtip prokýratýra salasynyń kóptiń kókeıindegi suraqtyń bárine qatysy bar ekendigin aıqyn ańǵartyp, olardyń basty maqsaty adamnyń quqyqtary men bostandyqtaryn qroǵaý ekenin dáleldeı tústińiz.
Osy rette tómendegi máselelerdi tikeleı ózińizge jazý sebebim Qyzylorda oblysynyń prokýrory H.D.Dáýeshovtyń ózine hat jazyp, jeke qabyldaýynda bolyp, mán-jaıdy túsindirgenmen nátıje shyqqan joq. Ondaǵylardyń sózine de, isine de kóńil tolmaıdy. Senimsizdik oryn alǵany ras. Sondyqtan da Siz Bas Prokýror retinde ádiletti sheshim shyǵarady dep oılaımyn.
Qyzylorda oblystyq sotynyń azamattyq isteri jónindegi sot alqasy QR densaýlyq saqtaý jáne áleýmetti damý mınıstrligi eńbek, áleýmetik qorǵaý jáne kóshi-qon komıtetiniń Qyzylorda oblysy boıynsha departamentiniń nemerem Jannur Erbolqyzyn múgedektikke shyǵarýdan bas tartý týraly áreketin zańsyz dep tanydy. Qyzylorda qalalyq sotynyń sheshiminiń kúshin joıdy. Apelásıalyq shaǵym qanaǵattandyryldy. Áıtse de janǵa batatyny zań talabynyń túsiniksiz jaǵdaıda oryndalmaı departamenttiń memlekettik qyzmetshileriniń quıtyrqy áreketteri arqyly, ózderiniń aıtqandarynan shyqpaıtyn kisilerdi jáne ádisneme, baqylaý bóliminiń basshysy Berdikeshovany quramyna engizip, bala quqyn shektegendigi. Medısınalyq áleýmettik saraptama jasaǵan komısıa sheshimi zańnan ústem bolyp turǵanyn osy hat arqyly sizdiń nazaryńyzǵa jetkizgim keldi. Memlekettik mekemedegi mundaı soraqylyqty zań talaby turǵysynda zerttep, zerdeleýińizdi sol arqyly tıisti sheshim qabyldaýyńyzdy suraımyn.
Ata zańymyzda jazylǵanyndaı «Eń qymbat qazyna – adam jáne adamnyń ómiri, quqytary men bostandyqtary» bolsa Jannur balamyz nege egemen eldiń zańdary boıynsha qorǵalmaı keledi? Qashanǵy «betpaq jeńdi, beıbaq kóndi» dep júre beremiz?
Máselege mán bersek sheshim ótken jyldyń 20 jeltoqsanynan bastap zańdy kúshine engen. Al, APK-niń 21 babynyń 2-shi tarmaǵyna sáıkes zańdy kúshine engen sot aktleri barlyq memlekettik organdar, jergilikti ózin-ózi basqarý organdary, zańdy tulǵalar, laýazymdy adamdar men azamattar úshin mindetti jáne QR búkil aýmaǵynda oryndalýǵa jatady. Solaı bola tursa da Qyzylorda oblysyndaǵy departament basshysy T.Jolymbetov apelásıalyq alqa tóraǵasynyń jaýap hatyna silteme jasaǵan syńaı tanytyp, laýazymyn asyra paıdalanyp otyr. Ujymdaǵy memlekettik qyzmetshiler ózara birimen-biri kelisip, sóz baılasyp bizden kek alý maqsatynda óshigip, osyndaı qysastyqqa barý ústinde. Óıtkeni oblystyq sot alqasy mamandarmen 6 jasar balanyń búırek qyzmeti deńgeıiniń tómendigi, dınamıkasynyń turaqsyzdyǵy, bala búıreginiń qalyptan tys jasandy jolmen qyzmet jasap turǵany eskerilmegen dep taıǵa tańba basqandaı atap kórsetse de áreketin zańsyz dep tanyǵan departamenttiń MÁS bólimi saraptama júrgizetin komısıa quramynda burynǵy adamdary bar №5 MÁS bólimi qaıtadan múgedektik belgileýden bas tartyp otyr. Al joǵarydaǵy atalǵan qaýlyda 16.05.2016 jylǵy №5 MÁS bólimi qorytyndysyna kúmán keltirilgen. Apelásıalyq alqanyń sot prosesinde departament qyzmetkerleri bastan aıaq qatysty. Pikir aıtty. Sheshimdi tik turyp tyńdady. Sonda bul qalaı? Bul departament basshysynan bastap ne isteı alasyń bizge degen oımen uıymdastyrylyp jasalǵan qysastyq áreket emes pe?
Janǵa batatyny departament basshysy T.Jolymbetov, onyń orynbasary J.Diljanova, №5 MÁS bólimi basshysy Myrzahmetova ózara top bolyp, birigip óz ókilettigimen laýazymdy mindetterin óz múddelerine oraılastyryp, sottyń zańdy sheshimin oryndaýǵa kedergi keltirip otyrǵandyǵy. Eń soraqysy Atyraýdan bala nefrolygy A.Shymyrǵalıevany shaqyryp, qorytyndy alýy. Osyndaı oqıǵalardan soń múgedektikke ótýge para berýge májbúr bolatyndyǵymyz shyndyq. Rasynda para bermeseń sottyń sheshimi de oryndalmaıtyn sıaqty.
Osy rette Elbasymyz Nursultan Nazarbaevtyń bıylǵy Qazaqstan halqyna joldaýynda «sot júıesine degen senimniń artýyna qol jetkizý qajet» dep atap kórsetýi tekten-tek aıtylmasa kerek. Sondyqtan bul oryndalýǵa tıisti mindet. Aıdyń kúnniń amanynda 6 jasar balany týa bitti syrqatyna da 4 jyl qatarynan ótken múgedektigine de hám kóz jasyna da qaramastan departament basshysy T.Jolymbetov bastaǵan memlekettik qyzmetshilerdiń birin-biri qoldap, qorǵap sot sheshimin oryndaýǵa degen ynta-yqylas tanytpaýy, qaıta onyń oryndalýyna qarsy shyǵýy Elbasy saıasatyna daq túsirip otyrǵandyǵy deýge bolady. Óıtkeni sotqa degen senimniń joǵalýyna birden-bir kináli departament basshysy ekeni aıdan anyq. Olaı bolsa T.Jolymbetov myrza sot bıligine de saıasatqa da túsirip otyrǵan daq, árıne qara daq. Astanaǵa tikeleı baǵynatyn Qyzylordadaǵy bul departamenttiń tóńiregindegi jaǵdaı ázirshe osyndaı bolyp tur. Sot sheshimimen departamenttiń áreketi zańsyz dep tanylsa da mundaǵy basshyǵa jáne memlekettik qyzmetshilerge eshkim eshqandaı shara kórgen joq.
Ótken jyly osy departamenttiń MÁS bóliminiń bir basshysy para alý jáne jetekshi mamany para berýge azǵyrý boıynsha qylmystyq isterge tartyldy. Adamnyń ómiri men densaýlyǵyn aqshaǵa táýeldi etip qoıǵan mundaı memlekettik qyzmetshilerden ne kútýge bolady? Oqıǵa bolǵan kezeńde departament basshysynyń medısınalyq áleýmettik saraptamaǵa jaýapty orynbasary E.Pernequlov mınıstrliktiń jaýapty hatshysy A.Qurmanǵalıevanyń buıryǵy boıynsha túk bolmaǵandaı óz aryzymen jumystan shyǵyp ketti. Sóıtip jaýapkershilikke tartylmaı qutyldy. Osynyń tigisin jatqyza bilgen departament basshysy T.Jolymbetov bolsa murtyn balta shappastan, miz qaqpaǵan qalpy jumsaq kresloda áli otyr. Syıynǵanynan súıengeni myqty bolsa kerek. Óıtkeni Astanada otyrǵan mınıstrliktiń komıtet tóraǵasy A.Sarbasov pen onyń orynbasary G.Toqseıtovalar oǵan shyq jýytpaı qorǵashtaýmen álek. Olar zańnyń sózin emes, T.Jolymbetovtyń sózin sóılep júr.
Halqymyz «Adam aqylymen symbatty, urpaǵymen qymbatty» dese, dana Abaı «Bala adamnyń baýyr eti» deıdi. Al Elbasymyz bıylǵy joldaýynda «Qazaqstandy keıingi urpaq úshin budan da ósip, órkendegen elge aınaldyramyz» dep mindet qoıyp otyr. Demek urpaǵymyz basty qundylyq bolǵandyqtan bala Jannurdyń da jurt qatarly bilimdi, deni saý bolyp, táýelsiz elimizdiń gúldenýine úles qossa eken dep kúni-túni bir Alladan tilek tileımiz. Biraq ol besikten beli endi shyqqan kezde jeń ushynan jalǵasqan toptyń ozbyrlyǵy men qıanatyna hám ádiletsizdigine tap bolyp jatsa, onyń qoǵamǵa degen oı-pikiri qandaı bolyp qalyptasar eken?
Qurmetti Jaqyp Qajymanuly! Osy hatty Sizdiń ózińizge joldaı otyryp, QR Konstıtýsıasynyń 83-baby 1-shi tarmaǵynda atap kórsetilgen mindetter turǵysynda ózińiz jeke baqylaýǵa alyp, QR ÁDM eńbek áleýmettik qorǵaý jáne kóshi-qon komıtetiniń Qyzylorda oblysy boıynsha departamentiniń tóńireginde qordalanǵan máselelerdiń aq qarasyn ádildikpen sheshedi dep úmittenemin.
Qurmetpen Beıbitbek Búrkitbaıuly,
QR mádenıet qaıratkeri, QR aqparat salasynyń úzdigi,
Qazaqstan Jýrnalıser Odaǵy syılyǵynyń laýreaty.
Qyzylorda qalasy
