Májilistiń halyqaralyq ister, qorǵanys jáne qaýipsizdik komıtetiniń tóraǵasy Máýlen Áshimbaev Reseı parlamentiniń depýtattary Qazaqstannyń táýelsizdigi jáne terıtorıalyq tutastyǵy máselelerine qatysty pikir bildirgende abaı bolýy tıistigin málimdedi. Bul týraly Azattyq habarlaıdy. Áshimbaev muny Reseı memlekettik dýmasynyń depýtaty Pavel Shperovtiń qańtardyń 26-sy parlamenttik dóńgelek ústel otyrysynda jasaǵan málimdemesine baılanysty aıtty. Shperov ol otyrysta Reseıdiń "uly el" ekenin aıtyp, "Dúnıejúzindegi óz múddemizdi qorǵaýymyz qajet" degen. Ol "Taıaý shetel dep júrgen elderde ázirge mundaı múmkindik bar. Qazaqstandaǵy orys otandastyrymyzdy dıaspora deý qate, óıtkeni olar otyrǵan jer - ýaqytsha shetel ıelengen bizdiń jerimiz. Máńgilik shekara joq, biz áli Reseı shekarasyna qaıta oralamyz jáne ol taıaý ýaqytta júzege asady" degen edi.

"Shperovtiń Qazaqstan terıtorıasyna qatysty aıtqan pikirin jónsiz dep sanaımyn. Mundaı pikir Qazaqstan men Reseıdiń strategıalyq áriptestik jáne odaqtastyq ustanymdaryna negizdelgen dostyq jáne tatý kórshilik qarym-qatynas aýanyna saı emes" degen Áshimbaev.

Máýlen Áshimbaevtiń sózinshe, Qazaqstannyń terıtorıalyq tutastyǵy men táýelsizdigi myzǵymaıdy jáne onyń shekarasy halyqaralyq kelisimder arqyly anyqtalyp, belgilengen. Komıtet tóraǵasy Qazaqstan-Reseı qarym-qatynasy 21-ǵasyrdaǵy tatý kórshilik jáne odaqtastyq týraly kelisim men Qazaqstan-Reseı memlekettik shekarasy týraly kelisimge negizdelgenin aıtady.

3 aqpanda Reseı syrtqy ister mınıstrligi Shperovtiń sózinen soń ınternette eki el baılanysynyń talqyǵa túsýine baılanysty Máskeýdiń Qazaqstanmen qarym-qatynasy boıynsha syrtqy saıasaty máselelerindegi resmı ustanymyn Reseı prezıdenti, premer-mınıstri, syrtqy ister mınıstri jáne ýákiletti tulǵa ǵana bildire alady dep málimdegen.