Betpaqdalada jyn joq, jyny nesi, dym joq. Adamy nesi, el joq... Ony bárińiz bilesizder. Túsimde osy betpaqdalaǵa ákim bolyppyn. Betpaqdala oblysy qurylyp, jan-jaqtan el kóship kelip, kósheler boı túzep... Ózderińiz bilesizder kelimsekter qazaq jeriniń eń shuraıly jerlerine qonystanyp jatsa, bizdiń qazekeń ıt baılasa turmas Betpaqdalaǵa qonystanyp jatyr. Qaqaǵan qys aıynda qalamyzdaǵy bir apaı birden bes bala tappasy bar ma? «Dala», «Jýsan», «Jantaq», «Topyraq» gazetteri shetterinen dabyralatyp jazyp jatty! «Demografıamyz kógerip jatyr!» dep.
Bir kúni buryn on balasy, endi qyzyl shaqa bes balasy bar alyp ana qabyldaýyma keldi.
--Kirsin,--dedim kómekshime. Eki balasyn arqasyna tańyp, eki balasyn etegine orap alyp, bir balasyn qoltyǵyna qystyryp kelgen apaı:
--Keshirińiz, úıge tastap ketetin, kútýshimiz joq, yńǵaı saqyrlaǵan erkekter...—dedi.
--Eshteńe etpeıdi. Áttegen-aı, tuńǵyshyńyz qyz bolmaǵan eken de...
--Qudaı ne berse, sony ala beremin, shyraǵym...
--Qaıda turyp jatyrsyzdar?
--«Jańadan oblys qurylypty» degen soń osynda kóship kelip edik... Úı berile me dep... Ázirshe qasqyrdyń apanynda turyp jatyrmyz...
--Eshteńe etpeıdi. Reseıde aıýdyń apanynda da turyp jatqandar bar deıdi...
--Qasqyrdyń apany sýyq, jylý, gaz, svet joq...
--Svet kirgizip beremiz. Tapsyrma beremin,--dedim men.
--Svet joq bolsa da, svetke tólep jatyrmyz...
--Qalaı sonda?
--Bilmeımin, shyraǵym, áıteýir aıdyń aıaǵynda sýǵa, jylýǵa, svetke «kibitánsıa» kelip turady...
--Uıatsyz kompanıalar! Alpaýyttar! Qasqyrdyń apanynan da aqsha alyp jatyr deseńizshi!
--Jer salyǵyn da tólep turamyz... «Qasqyr apany aspanda bolǵanda, tólemeıtin edińizder» deıdi salyqshylar...
--İm-m... Kúıeýińiz ne isteıdi?—dep suradym men.
--Kúıeýim múgedek... Eki aıaǵy joq.. Astanada qurylysta jumys istep júrip, segizinshi qabattan qulap, eki aıaǵy tizesinen synyp ketken...
--Ekinshi qabattan qulasa qaıter edi?.. Oılamaǵan ǵoı...
--Qasqyrlar kúnde apan aýzyna kelip, yryldap ketedi. «Shyǵyńdar!» deıdi...
--Olar sizderdi jep qoımaıdy ma?
--Bala-shaǵasy kóp adamdardy aıaıdy eken. Onyń ústine shetimizden aryq¬pyz...
--Jáısha júrsiz be?
--Ortalyqtan páter bergizseńiz... Ózińiz bilesiz, úshem tapqandar da páterli bolyp jatyr...
--Olar jastar... Sizdiń jasyńyz qanshada?
--Elý úshte...
--Uıalmaısyz ba apa... Kelinderińizben «marafonǵa» túsip...
--Endi shyraǵym...Kúıeýim múgedek...
--Múgedek ekeni kórinip tur. Siz de qyzyqsyz. Nege týa beresiz? Birdeńe kórindi me?
--Qudaıdyń bergeni de...
--Qudaı bere berse, ala beresiz be?
--Úı bermeısiz be sonda?
--Berilmeıdi! Qasqyrdyń apanynda tura berińiz!
--Qasqyrlardan da uıat eken. Súırep ákelgen qoı etterinen qashanǵy qýyrdaq jeı beremiz?
--Jaǵdaıyńyz jaqsy eken ǵoı! Apa, meniń jumysym bar, tús qaıta Astanaǵa ushyp ketýim kerek... Saý bolyńyz!
--Onda shyraǵym, myna bes balany jyly kabınetińe tastap ketemin! Kóktemge deıin! Saý bol shyraǵym!—degen alyp ana kabınetimnen shyǵa jóneldi... Stolymnyń ústinde ińgálap jatqan bes náresteniń daýsynan shoshyp, alyp ananyń artynan tura júgirdim. Áli júgirip kelemin...

Muhtar Sherim