Baıanaýylda ıgi jaqsynyń birazy týyp-ósken. Sátpaev, Marǵulan, Aımanov, Aımaýytov, Toraıǵyrov degendeı tizilip kete beredi. Biz Toraıǵyr aýylyna arnaıylap soǵyp, osynda ósken Sultanmahmut Toraıǵyrovtyń (aqynnyń týǵan jeri – Soltústik Qazaqstan oblysy) mýzeıine barǵan edik. Sultanmahmuttyń júz jyldyq mereıtoıynyń qarsańynda 1993 jyly jańa ǵımarat salyp beripti. Alaıda, shamalap bes júz qaraly aýyl ǵoı, qaıbir jaǵdaı jasasyn - mýzeıdiń ishi sýyq, ekskýrsovod apaı paltosyn sheshpeı júr. Aqyn ókpe aýrýynan azap shegip, ne durys oqı almaı, ne jóndi jumys isteı almaı, aqyry 27 jasynda qaıtys bolǵan soń, kórseter eksponat ta qalmapty.

Biraq, ózime bir alǵanym – mynaý eki foto boldy. Alǵashqy fotoda – Málıke Imanbaeva, Baıanaýyldyq qazaq áıelderiniń arasynan shyqqan alǵashqy muǵalıma. Sultanmahmuttyń qalyńdyǵy bolǵan eken. Tipti qalyńmalyn tólep, áne-mine neke qıamyz dep otyrǵanda, aqyn qaıtys bolyp ketedi. Sodan Málıke ary qaraı oqý izdenemin dep pe, aýyldan ketip qalady, basqa bireýge turmysqa shyǵady, 1930-shy jyldardaǵy asharshylyq kezinde qaıtys bolypty. 

Al qalyń mal tólenip qoıǵan, ony keri qaıtarýǵa múmkindik bolmaǵan soń, ary qaraı jaǵdaı bylaı bolǵan. Ekinshi fotoda - Málıkeniń sińlisi Naǵıma. Sol Naǵımany 12 jasynda Sultanmahmuttyń inisi álde aǵasy Báshenge (shyn aty Baıqońyr bolǵan-aý) turmysqa beredi. Osylaısha, aqynnyń kelini bolǵan Naǵıpa apamyz bertinge deıin ómir súripti.

Órken Kenjebektiń facebook paraqshasynan alyndy