Gennadıı Shıpovskıh — Májilistegi eń jas depýtat. Ári 27 jastaǵy halyq qalaýlysy qazaqsha sóılep, qazaq tilinde másele kóteretinderdiń biri. Osydan-aq tilge janashyr Gennadııdiń qazaqy tárbıe kórgenin ańǵarý qıyn emes. Bul jaıynda málimet Sputniknews.kz saıtynda jarıalanǵan.
Rasymen de, ol taǵdyr jazýymen berekeli qazaq otbasyna túsip, qazaqtardyń ortasynda ósip, erjetken. Osyndaı parasatty tárbıe berip, mol meıirimi men júrek jylýyn aıamaı, týǵan balasyndaı ósirgen ata-anasyna Gennadıı Shıpovskıh alǵys aıtýdan esh jalyqqan emes. Depýtattyń aıtýynsha, bıyl ekinshi jyl atalyp ótetin alǵys aıtý kúni jaqyndaryńa meıirimińdi tógip, rızashylyǵyńdy bildirý úshin taǵy bir jaqsy múmkindik.
Qyzylorda oblysynyń týmasy Gennadıı taǵdyrdyń taýqymetin bir adamdaı kórgen adam. On úsh jasyna qaraǵanda anasy, kóp uzamaı ákesi dúnıe salady da, bala jetimder úıinen bir-aq shyǵady. Bul jer kimge unasyn?! Bala Gennadıı de bir-eki ret qashyp ketpekshi bolǵan. Biraq baǵyna oraı, ol balalar úıinde uzaq turaqtamaıdy. Jetim balany Nasyrovtar otbasy asyrap alyp, baýyryna basady.
"Meni qazaq otbasy óte jaqyn qabyldady. Ol kezde ata-anadan aıyrylǵan meniń kóńilime qaıaý túsip edi, minezim turaqsyzdaý boldy. Qazirgi áke-sheshem sonyń bárin baıqap, kóńilimdi aýlap, óte jyly qabaq tanytty. Onyń ústine baýyrlarym da jaqsy qarsy aldy. Osylaı jańa otbasyma tez úırenip kettim", — dep eske aldy Gennadıı Shıpovskıh.
Osylaı ol ananyń aıaly alaqanyn, ákeniń meıirimin kórip, eshkimge jaltaqtamaı ósti. Ata-anasy Gennadııdi basqa balalarynan eshqashan bólip-jarǵan emes. Murat pen Baıan Nasyrovtar alty balanyń bárin de qanattyǵa qaqtyrmaı, tumsyqtyǵa shoqyttyrmaı ósiredi. Bes balasy bola tura taǵy bir jáýteńkózdi, ári qazaq emes, orys balasyn asyrap alýyn Gennadıı áke-sheshesiniń úlken júrektiligi, parasattylyǵy, ımandylyǵy dep biledi. Olardyń boıyndaǵy jaqsy qasıetterdiń ózine daryǵanyna óte baqytty.
"Ákem óte eńbekqor adam. Qazir mal sharýashylyǵymen aınalysady. Onyń ústine jastaıynan tehnıkaǵa beıimiligi bar. Bul qabileti maǵan da juqqan. Ákem aǵaıyn arasynda óte syıly, qurmetti, sózi ótimdi. Kez kelgen toı-jıynǵa aǵaıyndy bastap barady. Anam óte aqyldy jan jáne bilimdi. Matematıka, fızıka mamandyǵyn meńgerip shyqqanymen, tarıhty óte jaqsy biledi. Meniń tarıhqa degen qyzyǵýshylyǵymdy oıatqan óz sheshem. Al, eń bastysy, áke-sheshem úlken júrekti adamdar. "Áke kórgen oq jonar, sheshe kórgen ton pisher" dep beker aıtpaǵan. Ata-ananyń kózqarasy durys bolmasa, balanyń da túzý jolǵa túsýi ekitalaı. Durys tárbıe berip, jaqsy jolǵa túsirgen áke-sheshemizdiń arqasynda aq pen qarany, durys pen burysty, jaqsylyq pen jamanshylyqty aıyra alatyndaı bolyp óstik", — dep áńgimeledi Shıpovskıh.
Gennadııdiń qazaqsha aty – Altynbek. Ata-anasy on jetige kelgende azan shaqyryp qoıǵan eken. Tek ákesiniń ótinishimen óz tegin qaldyrypty. Biraq tegi orys bolǵanymen, qazaq elinde turyp, qazaq jerin basqan soń, ol ózin qazaqpyn dep sanaıdy. Júregi de, tili de qazaq. Qazaq tilin kishkentaı kezinen biledi. Qazaq balabaqshasynda, qazaq mektebinde oqyǵan.
"Birinshi qazaq tilin, sosyn orys tilin úırendim. Buǵan qosa, men qazaqsha oılanamyn. Ony moıyndaı ketý qajet", — dep aǵynan jaryldy Altynbek-Gennadıı. Qazaq ádebıetine de qyzyǵýshylyǵy joq emes. İlıas Esenberlın, Dúkenbaı Dosjannyń shyǵarmalaryn, Muqaǵalıdiń óleńderin jaqsy kóredi eken. Shıpovskıhtiń aıtýynsha, kez kelgen ult úshin eń qymbatty - ol tili. Til bar bolsa, halyq ta bar. Sondyqtan ana tilge degen qurmetti jastaıynan boıǵa sińirý úlken mańyzǵa ıe. "Jastarmen kezdesýler kóp bolady. Qazaq tilin barynsha nasıhattaýǵa tyrysamyn. Sebebi neǵurlym qazaq tilin jas urpaq kóbirek bilse, erteń tildiń tuǵyrǵa nyq ornyǵaýy soǵan baılanysty bolady. Qazaq tili — bizdiń ana tilimiz. Al ana tili ana sútimen birdeı dep oılaımyn", — deıdi Shıpovskıh.
Gennadıı Shıpovskıh qazir eń jas Májilis depýtaty. Bul qyzmettiń zor jaýapkershiligin arqalap júrgenine bir jylǵa jaqyndap qalǵan. Ol búgingi jetistikteriniń barlyǵyn Allanyń meıirimi men ata-anasynyń qamqorlyǵy, ystyq-yqylasy dep túsinedi. Balasynyń depýtat bolǵanyn estigende anasy uly úshin qatty qýansa, ákesi óziniń salıqaly keńesin bergen.
"Sheshemiz qýanyshtan jylady. Al ákem úlken keńes berdi. "Seni halyq saılady, sol halyqtyń ıgiligi úshin jumys atqar", — dedi. Sosyn "Basyńdy shapsa da, shyndyǵyńdy aıt. Osy ustanymdardy qyzmetińe arqaý etseń, seni árdaıym halyq ta qoldaıdy, el de qoldaıdy, barlyq jerde syıly bop júresiń", — dep aqyl-keńesin berdi", — deıdi depýtat.
Endigi maqsat — ata-ana úmitin aqtap, qashanda abyroı bıiginen kóriný. Osy kúnge jetkizgen, týǵan balasyndaı álpeshtep ósirip, jan jylýyn aıamaǵan otbasyna Gennadıı Shıpovskıhtiń alǵysy sheksiz. Onyń aıtýynsha, alǵys aıtý kúni - jaqyn adamdaryńa rahmetińdi jetkizý úshin taǵy bir jaqsy múmkindik. Sonymen birge, búgin ózge ulttardyń qazaq halqyna alǵys aıtatyn kúni. Alasapyran zamanda qazaq jerine aýyp kelgen ulttar qıyn-qystaý kezde bir úzim nanyn bólisip jegen qazaqtyń meıirimdiligin men qamqorlyǵyn eshqashan umytpaıtyny haq.
