30-aq jyl ǵumyr keship, otty jyrlarymen Qazaq ádebıetine ór iz qaldyrǵan Tólegen Aıbergenov edi. Ádebıet áleminde Muhtar Shahanov, Farıza Ońǵarsynova, Jarasqan Ábdirashev, Esenǵalı Raýshanov, Tynyshbaı Rahym sıaqty adýyndy aqyndardyń ózi ustaz tutqan Tólegen Aıbergenovti 80 jyldyǵynda ádebıet súıer qaýym eske alyp konferensıa ótkizedi. Bul týraly uıymdastyrý komıteti habarlady.

«Qurmetti Alash jurty!

Sizderdi aqyn Tólegen Aıbergenovtyń 80 jyldyǵyna arnalǵan «Tólegen Aıbergenov poezıasy jáne qazirgi zaman» atty Halyqaralyq ǵylymı-teorıalyq konferensıanyń qadirli qonaǵy bolýǵa shaqyramyz!

Ótetin orny: Almaty qalasy, Abylaı han dańǵyly 105 úı, Qazaqstan Jazýshylar odaǵynyń ǵımaraty 
Ótetin ýaqyty: 2017 jyl, 10 naýryz, saǵat: 10.00

Baılanys telefony: 87754787229», - delingen habarlamada.

Dúnıege óziniń appaq, tap-taza peıilimen kelip, sol kóńilmen ketken saǵynyshtyń aqyny Tólegen Aıbergenov 1937 jyly Qaraqalpaqstannyń Qońyrat aýdanynda týdy. 1959 jyly Tashkent pedagogıkalyq ınstıtýtyn bitirgen soń, 1965 jylǵa deıin mektep muǵalimi, mektep dırektory boldy.

Tólegen Aıbergenov alǵashqy jazǵan óleńderinen-aq qazaq poezıasyna tyń serpilis, jańa bir ekpin ákeldi. Onyń týǵan jerge degen saǵynysh pen móldir mahabbatqa toly óleńderi 1961 jyly shyqqan jas aqyn.jazýshylardyń «Jas dáýren» jınaǵyna kirdi.

Budan keıingi "Arman sapary", "Ómirge saıahat" (ekeýi de 1963 jyl), "Qumdaǵy munaralar" (1974 jyly Qazaqstan Lenın komsomoly syılyǵyn aldy), "Men saǵan ǵashyq edim" (1970), "Bir toıym bar" (1981, 1989) jınaqtarynda zamandastarynyń beınesi, ol aralaǵan qazaqtyń ólkesiniń syry men keni, daladaǵy uly tirshilik aqynnyń bir japyraq júreginiń súıispenshiligine bólengen.

1987 jyly T.Aıbergenovtiń "Mır sozvezdıı" atty tańdamaly jyrlary orys tilinde jaryq kórdi.

Arqaly aqyn, adaldyq pen ardy tý qyp kótergen azamat 1967 jyly Núkis qalasynda qaıtys boldy. Búginde Qazaqstan Jazýshylar odaǵynyń jastarǵa arnalǵan poezıa salasyndaǵy ádebı syılyǵy Tólegen Aıbergenov atynda.