8 aqpan kúni Qytaıdan Qazaq Eline oralý maqsatymen kóship kele jatyp, SHQO Zaısan aýdanyna qarasty «Maıqapshaǵaı» kedendik baqylaý beketinde 49,900 AQSH dollary tárkilengen Máýithan Gúljan esimdi jesir ananyń isine qatysty sot otyrysy 17 naýryzda ótedi. Bul týraly Baq.kz jazdy.
qoǵamda zor daý týǵyzǵan bul oqıǵadan soń, 9 naýryz kúni Astana qalasyndaǵy «Nur Otan» partıasynyń Respýblıkalyq qoǵamdyq qabyldaý bóliminde QR Parlamenti Májilisiniń depýtaty Baqytgúl Hamenova qolynan kelgenshe kómektesetinin aıtqan bolatyn.
Aıta ketetin bir jáıt, 17 naýryz kúni ótetin sot otyrysyna tek qana Máýithan Gúljandy ǵana shaqyrǵan. Jesir ananyń uly Muhtashuly Ádilbekke habarlasqan shaqyrýshylar sot otyrysyna tóraǵalyq etetin sýdıanyń aty-jónin aıtýdan bas tartypty.
Elimizdegi negizgi aqparat quraldary osy jaǵdaı týraly bastama kóterip, abai.kz, qamshy.kz, 31.kz, azattyq.org jáne t.b. aqparat quraldary Úkimet basshysy B.Saǵyntaev pen QR Bas prokýrory J.Asanovtyń nazaryna hat jazǵan edi.
«Elbasymyz Nursultan Ábishulynyń izgi bastamalarynyń biri – kóshi-qon saıasatyn arqa tutyp, Qytaı elinen atajurtym Qazaqstanǵa birjola qonys aýdaryp, kóship kele jatyp, shekaradan osyndaı úlken kedergige tap boldym. Ózim júrek talmasymen qatty aýyramyn. Qansha ǵumyrym baryn bilmeımin, kózim tiri kezde balalarymdy Qazaq Eline ornalastyryp, urpaqtarymnyń alańsyz ómir súrgenin kórsem deımin. Kishkentaı qyzym Muhtashqyzy Perızat Astana qalasyndaǵy №40 mektepte 6-synypta oqıdy», – dep kóz jasyn tókti jesir ana.
«Qazaqtyń jalǵyz otany – Qazaqstan» degen bolatyn Elbasy Nursultan Nazarbaev.
«Qazaqstannyń jeri keń, eli keń. Kelińder de aınalaıyn qazaǵym, kúnińdi kórip baıyńdar!»
Bul da – Elbasynyń sheteldegi qazaqtardy Atajurtqa shaqyrǵan, Dúnıejúzi Qazaqtarynyń İİ-shi Quryltaıyndaǵy sózi.
