Erlan Sydyqovtyń Eýrazıa Ulttyq ýnıversıtetine qalaı jáne qashan rektor bolǵanyn jurttyń esinen shyǵa qoıǵan joq. Bul sonaý 2011 jyldyń shilińgir shildesi edi deıdi skifnews.kz.

2010 jyldyń sońynda Shákárim atyndaǵy Semeı memlekettik ýnıversıtetin basqaryp júrgen tusta Sydyqov Nazarbaevtyń prezıdenttik ókilettigin 2020 jylǵa deıin uzartaıyq dep bastama kótergen bolatyn. Bastama kóterip qana qoımaı, jurtty referendým ótkizýge úgittedi, ol úshin 314 myńnan astam qol da jınady.

Árıne, referendým elde ótken joq. Elbasy bul bastamadan bas tartyp, 2011 jyly prezıdenttik saılaý ótkizdi jáne 95,5% daýyspen jeńip shyqty. Biraq, Sydyqovtyń eńbegi esh ketpesin dedi me, ony L.Gýmılev atyndaǵy Eýrazıa Ulttyq ýnıversıtetine rektor etip ózi taǵaıyndady.

Mine, keshe búkil azamattyq qoǵam Bilim jáne ǵylym mınıstri Erlan Saǵadıevtiń otstavkaǵa ketýin talap etip jatqanda, Erlan Sydyqov Pezıdentke kirip shyqty. Iá, resmı aqparat kózderinde onyń ótken jylǵa esep berip, qazirgi jumys barysy týraly aıtqany jazylýda. Degenmen, Aqordaǵa jaqyn "kisilerdiń" aıtýynsha, Memleket basshysy bir Erlan men ekinshi Erlannyń oryndaryn almastyrýy múmkin.

Bul árıne, saıası boljam ǵana. Óıtkeni, dál qazir akademıkter, pedagogtar, qoǵam belsendileri, keıbir qaıratkerler Erlan Saǵadıevtiń bilim salasyna engizip jatqan reformalaryna túbegeıli qarsylyq tanytýda. Qarsylyq tanytyp qana qoımaı, mınıstrdiń otstavkaǵa ketýin talap etip otyr. Al, mundaı sátte saıası boljamnyń jasalýy zańdylyq.

Eger Saǵadıev otstavkaǵa ketse mınıstrdiń kreslosyna akademık Asqar Jumadildaev otyrsa eken dep nıet bildirýshiler de az emes. Degenmen, kimdi mınıstr etip taǵaıyndaýdy halyq emes, Prezıdenttiń ózi sheshetini belgili. Sondyqtan, aldaǵy ýaqytta EUÝ rektory Erlan Sydyqov mınıstr bop jatsa oǵan da tań qalmańyz. Halyq arasynan 314 myń qol jınaı alsańyz siz de bir jerdi "tesip shyǵaryńyz" anyq.