Jańany qabyldaı almaý, eskige emeksý qashan da qazaqtyń sanasynan arylmaǵan ádet. «Qazaqstan» Ulttyq arnasyna jańa basshy kelip, tyń dúnıeler, sony betburystar jasalyp jatyr.

 «Oıbaı, «Kelin» degen bále boldy, ne jumys istetpeıdi, urpaǵymyzdy ózge dilge buryp barady» dep shýlaǵan úndi serıaldary da efırden alynyp tastaldy. Aldaǵy ýaqytta túrik serıaldaryna, túrli shoý-konsertterge de mundaı suryptaýlar jasalatynyn estip jatyrmyz.

Al «Basty aqparat» ataýymen «Jańalyqtar» da efırge sózi ótimdi, kásibı sheber, óz isiniń mamany Qymbat Dosjan men Danıar Meńilbekovtiń júrgizýshiligine ótti. Jańalyqtar qyzmetinde, elge aqparat jetkizýde ótkir máseleler kózdelip, halyqtyń áleýmettik máseleleri nazardan tys qalmaıtyn, aldaǵy ýaqytta naǵyz ulttyń joqshysy bolar arna ekendigin dáleldeı túspekshi.

Buryn sıpaı qamshylap, onsha bara bermeıtin taqyryptarǵa da keń kólemde oryn beriletinin de estip-bilip, kórip jatyrmyz. Onyń bir aıǵaǵy keshe ǵana ótken Konstıtýsıaǵa qatysty telekópir. Buǵan deıin «Qazaqstan» arnasynyń efırinen kórinbek túgili, esimderi atalmaıtyn Aıdos Sarym men Ámirjan Qosanovtyń pikirtalasqa qatysýynyń ózi aldaǵy ýaqytta ulttyq arnanyń qanshalyqty múmkindkke ıe bolǵandyǵyn baıqatady.

Búginnen bastap telearnadaǵy tyń ózgerister kórermen nazaryna jol tartty. Tańǵy uıqydan oıanyp, qyzmetke jınalǵan jandarǵa erekshe kóńil kúı syılap, naǵyz krıatıv usynǵan 25 jyldyq tarıhy bar «Tańsholpan» baǵdarlamasynyń jańa formaty kórermenderin birden baýrap aldy. «Tańsholpan» baǵdarlamasynyń basty ustanymynyń ózi – qyzmettegi jandarǵa arnalǵan. Ol qoǵamnyń barlyq salasyndaǵy kórermendi qoǵamnyń barlyq salasyndaǵy qyzyqty, tartymdy aqparatpen qamtamasyz etý. Eki júrgizýshige kózi úırenip, odan artyq adamdy qabyldaı almaıtyndaı deńgeıge jetken kórermender úshin tórt birdeı júrgizýshini qabyldaı qoıý ońaıǵa soqpasy belgili. Al shyn mánisinde, tórteýi birin-biri tolyqtyryp otyrǵanyn baıqaýǵa bolady.

Arna basshysy Erlan Qarın aldaǵy ýaqytta da tyń ózgerister bolatynyn aıtyp otyr. Jáne ol bir sózinde Alash qaıratkerleriniń ómirin, olardyń tartysqa toly taǵdyrynyń bir sátin kórsetetin serıal jasaýdy da tapsyrǵanyn aıtty.

Sonymen qatar, «Tańsholpanda» da, «Basty aqparatta» da sarapshy-mamandardyń bolýy arnanyń halyqaralyq standartqa saı, ár baǵdarlamaǵa, ár aqparatqa, qoǵamda bolyp jatqan kez kelgen oqıǵaǵa syn kózben qaraýǵa jeteleıdi. Telearnanyń mundaı ustanymy aldaǵy ýaqytta damı túsedi ǵoı dep oılaımyz.

Ózimiz jaqsy kóretin bir sózimiz bar ǵoı, «Máskeý bir kúnde turǵyzylǵan joq» deıtin. Osy sózdi ulttyq arnanyń qazirgi betburysyna da qoldanǵan durys dep oılaımyn. Qyzmetke kelgenine bir aı endi ǵana bolǵan Erlan Tynymbaıulynyń qolǵa alyp jatqan qyzmetine qoldaý bildirip, ulttyq arnamyzdyń shynymen de ultqa qyzmet eter arna bolýyna at salysaıyq.

Ulttyq arnanyń ult úshin qyzmet etip kele jatqanyn barshańyz jaqsy bilesizder, aldaǵy ýaqytta da bul ustanymnan jańylmasy anyq.