Búgin, Almatydaǵy Ulttyq kitaphanada «Ahmet Baıtursynulynyń ǵylymı murasy: zertteý, júıeleý, nasıhattaý» atty ǵylymı konferensıa ótip jatyr dep habarlaıdy Qamshy.kz tilshisi.

Ult ustazy Baıtursynulynyń ǵylymı murasy týrasyndaǵy ǵylymı konferensıany Ahmet Baıtursynuly atyndaǵy Til bilimi ınstıtýty men QR Ulttyq kitaphanasy uıymdastyrǵan.

Ǵylymı konferensıa aıasynda Kitaphananyń sırek qorynan Baıtursynuly eńbekteri týrasyndaǵy kórme uıymdastyrylǵan. Ulttyq kitaphana dırektory Janat Seıdýmanovtyń aıtýynsha kitaphanada Baıtursynuly muralary týrasynda 2502 eńbek bar. Olardyń kóbi sırek qorlarǵa jatady.

Ǵylymı konferensıaǵa qazaqtyń zıaly qaýym ókilderinen úlken shoǵyr jınalǵan. Qatysyp jatqandar arasynda  ǵumyryn qazaq tili tarıhy men gramatıkasy, til mádenıeti máselelerine arnaǵan akademık Rábıǵa Syzdyq pen Shora Sarybaev,  akademık Ómiruzaq Aıtbaev, profesor Tursyn Jurtbaı, profesor Aıgúl İsmaqova sıaqty ǵalymdar, Baıtursynulynyń jıeni Aıman Baısalova, sonymen qosa bir top jas ǵalymdar men stýdentter bar.

Konferensıa týraly tolyqtaı materıal aldaǵy saǵattarda jarıalanady.