Birinshi orta salmaqtaǵy WBO Intercontinental jáne WBA Fedelatin tujyrymdary boıynsha álem chempıony, kásipqoı boksshy Qanat Islamnyń EKSPO-daǵy jekpe-jegi chempıondyq ataq úshin bolýy múmkin. Bul týraly búgin QR Mádenıet jáne sport mınıstri Arystanbek Muhamedıulymen bolǵan kezdesýde Qanat Islamnyń demeýshisi Baýyrjan Ospanov málim etti, dep habarlaıdy QazAqparat.

«Qanat qazir jalpy reıtıńte úzdik ondyqqa kirip otyr. Negizgi úsh tujyrym boıynsha álem chempıony ataǵyna shyǵa alady. Biraq oǵan deıin kútpeı, bıyl mamyrda taǵy da bir jekpe-jekti Amerıkada ótkizýdi josparlap otyrmyz. Úlken jerde ótýi kerek. Qazir ony kelisip jatyrmyz. Odan keıin Qudaı qalasa, EKSPO-da jekpe-jek ótkizemiz dep otyrmyz. Bul jerde negizgi degen úsh tujyrymda álem chempıony ataǵyna shyǵýǵa kelisip jatyr. WBO degen bar. Onyń chempıony Kanelo qazir joǵary ketip jatyr, sonyń ornyna WBO uıymy Qanatty kórgisi keledi. Kanelo ketse, onyń ornyna chempıondyq ataq úshin talasty EKSPO-da Qanat túsýi múmkin», - dep atap ótti ol.

B. Ospanovtyń sózinshe, WBO-men qatar, ózge de uıymdarmen chempıondyq belbeýge qatysty kelissózder júrgizilýde.

«Taǵy eki tujyrym bar, WBA jáne IBF degen uıymdar, osylarmen de kelissózder júrgizip jatyrmyz. Bul salmaqta álemniń eń myqtylary tur: Meıvezer, Kanelo, Pakáo sıaqty. Qanat endi sol tujyrymdar boıynsha kelisim júrgizýde. Qudaı qalasa, mamyr aıyndaǵy jekpe-jek sátti ótse, olarmen álemdik chempıondyqqa talasatyndaı, kelisimshartqa otyrýǵa bolady», - dedi mesenat.

Aıta keteıik, búgin QR Mádenıet jáne sport mınıstri Arystanbek Muxamedıuly kásipqoı boksshy Qanat Islamdy jáne tanymal kásipker Baýyrjan Ospanovty qabyldap, EKSPO aıasynda Qanat Islamnyń kásipqoı boks keshiniń kúnin aldyn ala jarıa etken bolatyn.