17 naýryz kúni M.Áýezov atyndaǵy Qazaq Memlekettik akademıalyq drama teatrynda soǵys zamanynda tyldaǵy halyqtyń náýbetin sýretteıtin M.Omarovanyń «Kómbe nannyń dámi» qoıylymynyń premerasy ótti.
Erkek ataýly túgel maıdanǵa attanǵanda, aýyldaǵy qıamet-qıynshylyq analarymyzdyń, shal-kempirlerdiń, bala-shaǵanyń moınyna artyldy. Bireýdiń baýyr eti balasy ketse, bireýdiń baýyry, bireýdiń súıip qosylǵan jary, endi bireýiniń sóz baılasqan kúıeý jigiti ketti. Alaıda, eń aýyr júk analarymyzǵa tıgen zaman boldy. Soǵysqa attanyp ómir men ólimniń arasynda arpalysyp júrgen balalaryn oılap qaıǵyra ma, álde qasynda qalǵan balasy ashtyqtan ajal qushpasa eken dep qaıǵyra ma? Zaryǵa kútip júrgen balasynyń ornyna kún saıyn bir qaraly qaǵaz keledi. Ol qaraly qaǵaz anaǵa bala bola ma? Ana júregnidegi jarany jeńildete me?
Onymen qosa, Keńes úkimetiniń saıasatyna qaıshy bolyp kóringen túrli ulttardy týǵan jerinen aıyryp, qazaqtyń jerine qonystandyrdy. Óz jerinde japa shegip, qan jutyp jatsa da, qazaq jurty ózge ult ókilderin qushaq jaıa qarsy aldy. Óz baýyryndaı kórdi, demedi, qoldady, bir úzim nanymen bólisti.
Bastarynan qandaı qıamet keshse de, naǵyz shynaıylyq sol kezde boldy. Shynaıy mahabbat, shynaıy kúlý, shynaıy jylaý. Eń bastysy ulttar arasyndaǵy naǵyz baýyrmashyldyqtyń shynaıy kórinisi.
Osyndaı shynaıylyqty sezindirgen «Kómbe nannyń dámi» qoıylymynyń premerasy sátti shyqty. Qoıylymnyń qoıýshy-rejısseri Qazaqstannyń eńbek sińirgen qaıratkeri Alma Kákisheva. Aıta keteıik, drama «Teatr kóktemi – 2017» festıvaline qatysady.
Qamshyger: Gúlim JAQAN
