Reseı Premer-mınıstri Dmıtrıı Medvedev Reseıde kelisimsiz ótken mıtıńterge baılanysty oıyn aıtty, dep habarlaıdy «Qamshy» aqaparattyq agenttigi.

Medvedevtiń aıtýynsha, bılikke qarsy mundaı aksıalardy óziniń saıası maqsatyna jetpek bolǵandar ǵana uıymdastyrady.

TASS agenttiginiń málimetinshe, Medvedev ózine qatysty korrýpsıalyq zertteýlerdi «ornysyz soqtyǵý» dep baǵalap: «Mundaı aksıa kimge qajet dep oılaısyzdar? Árıne, óziniń naqty saıası maqsaty bar adam úshin paıdaly», deıdi ol.

4 sáýirde Medvedev «Rýsargo» agroholdıngindegi «Tambovty shoshqa eti» et shyǵaratyn kásipornyna baryp, jumysshylarmen kezdesip qaıtty.

Sondaı-aq, oppozısıoner Alekseı Navalnyıdyń uıymdastyrýymen ótken jemqorlyqqa qarsy aksıadaǵy ózine taǵylǵan aıyp týrasynda jaýap berdi.

Medvedev KKQ-nyń zertteýin «adamdardy kóshege alyp shyqqysy keletin jekelegen ınvestorlar qarjylandyrǵanyn» málimdedi. Ol zertteýde keltirilgen materıaldardy «byljyraq jáne qur qaǵaz» dep, zertteýdiń ózin «kompot» dep atady.

Budan buryn Reseı prezıdenti Pýtın Máskeýde, sonymen qatar, Reseıdiń basqa da qalalarynda kelisimsiz túrde ótken aksıalardyń túbinde «ashkózdik, paıdaqorlyq» jatyr degen bolatyn.

Eske sala keteıik, 26 naýryzda Reseıdiń birneshe qalasynda jemqorlyqqa qarsy mıtıńter ótti. Sońǵy aqparat boıynsha, Navalnyımen qosqanda myńǵa jýyq adam tutqyndaldy.