Esterińizge sala keteıik, Pavlodar oblysynyń polıseıleri júk kóligi men balalar otyrǵan avtobýstyń soqtyǵysýyna jol bermedi. Oqys jaǵdaı Pavlodar-Astana tas jolynda Spýtnık jáne Pogranıchnık aýyldarynyń arasynda bolǵan edi. Avtobýsta 18 bala men 4 tárbıeshi bolǵan.

Qazirgi tańda Murat Nurseıitov Baıanaýyl aýylynda em qabyldap jatyr. Dárigerlerdiń aıtýynsha, tártip saqshysynyń densaýlyǵyn ońaltý úshin áli jarty jyldaı ýaqyt kerek.

«Pavlodarlyq aq halatty abzal jandar meni o dúnıeden ákeldi. Al astanalyq dárigerler ómir úshin kúresý kerektigin úıretti. Alǵysym sheksiz. Olar bolmasa, qazir sizben emin-erkin sóılesip, týǵan-týysqandarymnyń ortasynda otyrmas edim. Armanym sol, tezirek saýyǵyp, qatarǵa oralǵym keledi», - deıdi Murat Nurseıitov.

Sońy qaıǵyǵa ulasýy múmkin jantúrshigerlik jol apatyn Murat qorqynyshpen eske alady.

«BAQ bolǵan oqıǵa meniń esimde joq ekenin jarysa jazdy. Bul shyndyqqa janaspaıdy. Esimnen tanyp qalǵanym ras, biraq mán-jaıdyń bárin bilemin. Áli esimde, jol kóktaıǵaq boldy. Biz balalarmen Baıanaýyldan Pavlodar qalasyna bara jattyq. Jolda kezdesken jeńil kólikter bizge jol berip otyrdy. Bizge qarsy úsh júk kóligi kele jatty, biraq jol beretin túri joq. Olar bizge jarty shaqyrymdaı qashyqtyqqa jaqyndaǵan sátte, bizge KamAZ-dyń avtobýspen soqtyǵyspaýy úshin áreket etý kerek boldy. Batyl sheshim sanaýly sekýndttardyń ishinde qabyldandy. Áriptesimiz ekeýmiz qyzmettik kóligimizben soqqyny ózimizge aldyq», - deıdi Murat Nurseıitov.

Qazirgi ýaqytta Murat dárigerlerdiń keńesimen kóp qozǵalmaıdy. Dese de, súıikti jumysyna asyq. Janynda jary Ásel bar. Búginde úıdegi sharýashylyqtyń bári jubaıyna júktelgen.

«Dárigerler densaýlyǵymdy kútip, kóbirek tynyǵýǵa keńes berdi. Tezirek jumysyma oralsam eken. Men ómirime arasha bolǵan dárigerlerdiń aldynda basymdy ıemin. Shyny kerek, bir kúni osyndaı jaǵdaıǵa tap bolamyn dep oılap kórmeppin. Esimnen keter emes. 17 aqpanda Pavlodar qalalyq №1 aýrýhanasynyń jansaqtaý bólimine tústim. Jaǵdaıym ońdy boldy. Dene jaraqattarym kóp bolǵanyna qaramastan, esimnen tanǵan joqpyn. Biraq, eki kúnnen soń densaýlyǵym nasharlap ketti. Komaǵa túsip, jasandy demalý apparatynyń kómegimen tynystappyn. Abyroı bolǵanda, meniń ómirim úzdik dárigerlerdiń qolyna tapsyryldy. Olar bolmasa, «Búgingi jaǵdaıym ne bolar edi? degen saýal qoıýǵa da qorqamyn», - deıdi batyr polıseı.

"Men batyr emespin. Tek qana qyzmettik boryshymdy ótedim" deıdi ol.

34 jastaǵy Murat 16 mamyrda Astanaǵa qaralýǵa attanady. Polıseı optımısik kóńil-kúıde, ońalý prosesi tez ótetinine senimdi.

«Ókinishke qaraı, ázirge ózim júre almaımyn. Qazirgi ýaqytta týǵan-týysqandarym qonaqqa kelip, hal-jaǵdaıymdy bilip turady. Júre bastaǵan soń, balalarmen kezdeskim keledi. Olar shahmat týrnırinde birinshi oryndy qanjyǵasyna baılap, jeńisterin maǵan arnapty. Qýanyshtymyn!» - deıdi Murat Nurseıitov.