Taldyqorǵanǵa mamyr aıynda tabıǵı gaz qosylady. Jalpy, qalany kógildir otynmen qamtamasyz etý tórt kezeń boıynsha júzege asyrylmaq.

Oblys ortalyǵyndaǵy gaz qubyrlarynyń jalpy uzyndyǵy 1370 shaqyrym bolady. Gaz qubyrlarynyń dıametri 32 mm.-den 530 mm.-ge deıin. 54 myńnan astam turǵyn kógildir otyn raqatyn kóredi degen senim bar. Qurylys-montaj jumystarynyń jalpy quny 24 mlrd. teńge. Bul týraly Almaty oblysynyń óńirlik komýnıkasıalar qyzmetinde ótken brıfıńte Taldyqorǵan qalasy ákiminiń orynbasary Asqar Tutubaev málimdedi.

- Birinshi kezektegi jumystardyń jalpy quny 4,4 mlrd. teńgeni qurap otyr. Alǵashqy kezeńdegi qurylys 6 iske qosý kesheninen turady (3 iske qosý kesheniniń qurylysy byltyr bastalǵan). Barlyǵy 181,5 km, sonyń ishinde joǵarǵy qysymdy 12,9 km jáne 168,3 km ishki kvartaldyq gaz qubyrynyń qurylysy qarastyrylǵan. Jospar boıynsha 10399 abonentti gazben jabdyqtaý, sonyń ishinde kópqabatty turǵyn úıler boıynsha - 4718 jáne  jeke sektorda - 5681 abonent, sonda shamamen 41,7 myń adamdy quraıdy. Birinshi kezekte jeke sektor, Abylaı han kóshesi boıymen, aınalma joly, Qaratal shaǵyn aýdany, jańa qurylys, oblystyq aýrýhana aýdany, temirjol  vokzaly aýdany, qalanyń ortalyq bóligi qamtylady, - dedi A. Tutybaev.