Elimizdiń Ult kóshbasshysy Nursultan Nazarbaevtyń el men jerdiń ıgiligi úshin qalyń buqara halqymyzǵa arnaǵan «Qazaqstannyń úshinshi jańǵyrýy: Jahandyq básekege qabilettilik» atty jahandyq Joldaýynda, táýelsiz ári darhan memleketimizdiń úshinshi jańǵyrýyna qadam basqanyń aıryqsha atap ótti.
Bul ataýly ári tolaǵaı qujat Qazaqstannyń shırek ǵasyr ishinde dúnıejúziniń alpaýyt elderimen teń dárejede ıyq tirestire alatyn deńgeıge jetip, el múddesi úshin birtalaı mańyzdy isterdi iske asyrdy. Sóıtip, Qazaqstanda jahandyq deńgeıde damýdyń betke ustar ózindik modeli qalyptasty.
Qazirgi tańda eljandy otandastarymyzdyń kókireginde óz eline degen sheksiz maqtanysh pen rızashylyq sezimi ornap, el keleshegine zor senimmen qaraýda. Buny estý men bilýdiń ózi «el dese, ishken asyn jerge qoıatyn» halqym úshin bir ǵanıbet.
«Halqym – qazynam, qazanym» demekshi, atalǵan Joldaý qazirgi jahandyq daǵdarysty tıimdi joldarmen eńserý maqsatynda túrli usynystar engizip, el ekonomıkasyn damytyp, áleýmettik hal-ahýalyn turaqtandyrý men qaýipsizdigin kúsheıtýge jańa serpin men dem berip, jaǵymdy yqpal eteri sózsiz.
Osyǵan oraı, Elbasymyzdyń Joldaýynda kózdelgen bes negizgi basymdyqtardyń ishindegi el qaýipsizdigin kúsheıtýge arnalǵan úshinshi basymdyǵyna jeke toqtalyp ketsem.
Atalǵan basymdyqta, búgingi kúnniń álem sahnasynda beleń alǵan «terorızm men ekstremızm» degen ǵasyr ińdetimen belsendi kúres júrgizý máselesine erekshe kóńil bólingen. Bul jóninde Memleket basshysy óz Joldaýynda, «Bul rette destrýktıvti kúshterdi qarjylandyratyndarǵa, sheteldik terorıstik uıymdarmen baılanys jasaıtyndarǵa qarsy kúres júrgizý isi negizgi másele bolyp sanalady», dep atap ótken bolatyn.
Sonymen qatar, Joldaýda ǵalamtor men áleýmettik jelini ekstremıstik áreketterge tartý men dástúrli dinge jat ıdeologıany nasıhattaý quraly retinde paıdalanatyn lańkesterdiń jolyn aldyn ala kesip, naqty toıtarys berý jumystary aıqyndalǵan.
Osy oraıda asa mańyzdy ári erekshe nazar aýdaralyq jáıt, Elbasymyz din salasyndaǵy kez kelgen radıkaldy kóqarastyń saldarynan paıda bolǵan olqy áreketterge «múlde tózbeýshilikti» qalyptastyrý jaıly sózi. Sondaı-aq, Joldaýda bas bostandyǵynan aıyrý oryndarynda jazasyn ótep jatqan sottalýshylardyń dinı saýattylyǵyn arttyrý boıynsha maqsatty jumystar júrgizý men bolashaq urpaqqa rýhanı-adamgershilik tárbıe berý maqsatynda qosymsha qadamdar jasaý, sondaı-aq memlekettik emes sektor men dinı birlestikterdi tartý jóninde naqty usynystar men iske asyrý jobalary oryn alǵan.
Qazirgi tańda, QR Prezıdentiniń tapsyrmasy boıynsha atalǵan usynystar, «Qazaqstan Respýblıkasyndaǵy dinı ekstremızm men terorızmge qarsy is-qımyl jónindegi 2017 – 2020 jyldarǵa arnalǵan memlekettik baǵdarlamada» tolyqqandy eskerilip, qarqyndy túrde júzege asatynyna esh kúmánim joq.
Qoryta kele, búkil Qazaqstan halqyna zor jaýapkershilik pen kúsh-qýat talap etetin Elbasymyzdyń Joldaýy, «jumyla kótergen júk jeńil» degen dana halqymyzdyń qanatty sózin basshylyqqa alyp, el bolashaǵy men ıgiligi úshin jańa dáýirdiń jahandyq Joldaýynda kózdelgen barsha mindetterdi eseli eńbek, birlik pen yntymaq arqasynda júzege asyra alatynymyzǵa kámil senemin.
Sondyqtan da Elbasy N.Á.Nazarbaev halqyna joldaǵan bıylǵy Joldaýynda, «Bolashaǵyn aıqyndap, syn-qaterlerdi kútip otyrmastan, oǵan tabandy túrde qarsy tura alatyn halyq qana jeńiske jetedi», degen sózin jadymyzǵa túıip, el yrysy úshin qyzmet etip, artylǵan ıgi bastamalar men izgi úmitti aqtaýǵa bar kúshimizdi salǵanymyz abzal.
Ábýov A.P.
QR DİAQM DİK Mádenıetter men dinderdiń halyqaralyq
ortalyǵynyń dırektory, f.ǵ.d. profesor
