2017 jyldyń 6 sáýirinde «Atakent-EHRO» kórme ortalyǵynda «İH halyqaralyq kitap jáne polıgrafıa kórme-jármeńkesi» ótti. Kórmege ár baspa úıi basyp shyǵarǵan kitaptaryn usynýmen qatar, kórme dese kórýge qumar kópshilik tarıhı oqıǵanyń kýágerleri bolyp qaıtty. Táýelsizdiktiń sımvolyndaı bolyp ketken «Kók týdyń jelbiregeni» atty ánniń sózin jazǵan, sózine búkil elge, Otanǵa degen san jyldyq saǵynyshyn jazǵan Ahmetbekuly Almas myrzanyń «Sardar» baspa úıinen 1000 dana taralymmen jaryq kórgen «Kók týdyń jelbiregeni» atty jyr jınaǵynyń tusaýy kesilip, besigi terbetildi. Qazaqstannyń Halyq jazýshysy Qabdesh Jumadilov, «Sardar» baspa úıiniń dırektory Ádil Qoıtanov, Halyqaralyq «Alash» ádebı syılyǵynyń laýreaty Ǵalym Jaılybaı myrzalar syıly qonaq bolyp, ádebıet, óleń súıer qaýymǵa Ahmetbekuly Almas myrzanyń tól týyndysy jaıly óz pikirlerin jetkizip, lebizderin bildirdi.
Qabdesh Jumadilov myrza : «Almastyń arǵy ustazy M.Dýlatov, bergide pir tutqan aqyny J.Nájimedenov. Ekeýi de osal emes. Jalpy «Kók týdyń jelbiregeni» óleńin Mirjaqyptyń «Men bitken oıpań jerge alasa aǵash» óleńiniń qasynda tursyn dep jarysa jazǵan dersiń...»,-deı kele, búgin tusaýy kesilip jatqan kitaptyń taralymy 1000 ǵana dana»,-dep baspa isiniń bilikti mamandaryn qulaq qaǵys etti.
«Táýelsizdiktiń qarlyǵashtary ushqan kezde elge oralǵandardyń alǵashqylarynyń biri bolyp kelgen kisi Ahmetbekuly Almas baýyrymyz. Marfýǵa (Marfýǵa Aıthojına), Qabekeńder(Qabdesh Jumadilov) , Ahmetbekuly Almas - qazaqtyń ádebıetine, poezıanyń muhıtyna tap-taza bir móldirin alyp kelgen tulǵalar»,-dep sóz sóıledi Halyqaralyq «Alash» ádebı syılyǵynyń laýreaty Ǵalym Jaılybaı myrza.
«Sardar» baspa úıiniń dırektory Ádil Qoıtanov myrza : «Kitapty ekinshi ret basyp shyǵarýymyzdyń basty sebebi- halyqtyń suranysy. Almekeńniń óleńderin qaıdan alsaq bolady dep izdep kelýshilerdiń kóbeıýine baılanysty jáne Táýelsizdiktiń 25 jyldyǵyna oraı ákimshiliktiń sheshimimen basyp shyǵaryp otyrmyz...Áli de jazaryń kóp bolyp, kitabyń tom-tomǵa aınala bersin»,-dep tilegin bildirdi sóziniń sońynda.
«...Jalǵyz Otan, kóteremin arqama
Bolmasam da jaýyryndy,eńseli.
Jalǵyz Otan, kóteremin tóbeme,
Tóbem bıik bolmasa da tym eren...» degen óleń joldaryn avtordyń óz aýzynan etigendegi sezim ózgeshe... Eńseńdi bıiktetip, abyroıyńdy asqaqtatyp, Táýelsizdikti tirek etip , Otandy súıýge, Týǵan jerdiń qasıeti men qasıetti uldaryn qurmetteýge basshy bolatyn jaqutty jyrlary ár bir qazaqtyń júreginen oryn alatyny belgili...
«Ár shýmaǵym –soǵyp turǵan júregim» dep jyrlaǵan aqynnyń jyrlary ótken kúnniń habarshysy ǵana emes, kemel keleshektiń kórinisi ispettes...
Qamshyger: Aıgerim Taýbaı
