Elimiz Táýelsizdik alǵan kezde elge oralǵan qandastarymyzdyń alǵashqylarynyń biri - aqyn Almas Ahmetbekuly. Eńseńdi bıiktetip, abyroıyńdy asqaqtatyn «Kók týdyń jelbiregeni» óleńiniń avtory aqyn Almas Ahmetbekulynyń «Kók týdyń jelbiregeni» kitaby halyq suranysynyń artýyna baılanysty ekinshi ret baspadan shyǵyp otyr.
2017 jyldyń 6-shy naýryzynda «Atakent-EHRO» kórme ortalyǵynda «İH halyqaralyq kitap jáne polıgrafıa kórme-jármeńkesi» ótti. Kórmege ár baspa úıi basyp shyǵarǵan kitaptaryn usynýmen qatar, kórme dese kórýge qumar kópshilik tarıhı oqıǵanyń kýágerleri boldy. Táýelsizdiktiń sımvolyndaı bolǵan «Kók týdyń jelbiregeni» atty ánniń sózin jazǵan, sózine búkil elge, Otanǵa degen san jyldyq saǵynyshyn jazǵan Almas Ahmetbekulynyń «Sardar» baspa úıinen 1000 dana taralymmen jaryq kórgen «Kók týdyń jelbiregeni» atty jyr jınaǵynyń tusaýy kesildi dep habarlaǵan edik.
Qos birdeı qýanyshty jańalyq barysynda Almas Ahmetbekulymen búgingi kezdegi óleń, ádebıet jańalyqtary jaıynda oıyn surap, suhbattasqan edik.
Qurmetti Almas Ahmetbekuly, búgingi «Kók týdyń jelbiregeni» atty kitabyńyzdyń halyqtyń suranysy boıynsha ekinshi ret baspadan shyǵýy úlken qýanysh. Qutty bolsyn! «İH halyqaralyq kitap jáne polıgrafıa kórme-jármeńkesi» jaıly jáne búgingi kúndegi kitaptyń oqylýy jaıynda pikirińiz qandaı?
Kitap kórmesi jyl saıyn dástúrli túrde ótetin is-shara. Búginde kitap súıer qaýymnyń bas qosatyn mekenine aınalyp otyr. Al qazirgi kúndegi kitaptyń oqylýyna keler bolsaq, jaqsy kitaptar oqylady. İzdep júrip oqıtyn kitaptar da bar. Kitaptyń oqylýy onyń sapasy men sanyna baılanysty.
«Bir el – bir kitap» Respýblıkalyq aksıasy aıasynda jalpyhalyqtyq oqýǵa Jyl kitabyn tańdaý otyrysynyń nátıjesi boıynsha Alashordanyń 100 jyldyǵyna baılanysty Sultanmahmut Toraıǵyrovtyń shyǵarmashylyǵy tańdap alyndy. Osy jaıynda ne aıta alasyz?
Óte jaqsy. Sultanmahmut Alashtyń alǵashqy týyn kótergen aqyn. Ol Alash ıdeıasyn halyqqa jetkize alady.
Ózińiz úlgi tutatyn aqyn kim?
Abaı , Dýlat Babataıuly, Mirjaqyp Dýlatov, Jumeken Nájimedenov. Osy kisilerdiń poezıasy maǵan keremet unaıdy.
«Kók týdyń jelbiregeni» ániniń eń aldymen sózi jazyldy ma, álde mýzykasy jazyldy ma?
«Kók týdyń jelbiregeni» óleńine Ermurattan buryn da ánder jazylǵan bolatyn . Alaıda olar unaǵan joq. Sosyn Ermuratqa usynysty men jasadym. Burynǵy Ánurannyń qalybynan paıdalanyp, Ánuran deńgeıindegi dıapazony keń án jazylý kerek degen ıdeıa boldy.
Almas Ahmetbekuly, ýaqyttyń tapshylyǵyna qaramastan bergen suhbatyńyzǵa raqmet!
Shyǵarmashylyǵyńyzǵa tabys, otbasyńyzǵa bereke tileımin!
Suhbattasqan : Aıgerim Taýbaı
