Soltústik Qazaqstan oblysynyń ákimi Qumar Aqsaqalov  jumys saparymen Aqqaıyń aýdanynda boldy dep habarlaıdy «Qamshy» aqparattyq agenttigi. Smırnovo aýylynda  óńir basshysy  «Sapro-Nat» JSHS-niń  bý qazandyǵy  modýlimen tanysty. Kompanıanyń bas dırektory  Áltaıyr Syzdyqovtyń aıtýynsha, 2016 jyly  seriktestiktiń balansynda  4  bý qazandyǵy bar edi. Sodan beri  oblys boıynsha 19  qazandyq ornatyldy. Olardyń kópshiligi Aqqaıyń aýdanynda ornalasqan.

 Qazandyqqa   joǵarydan janý ádisi qoldanylady. Nátıjesinde  otyn únemdeledi  jáne paıdaly qyzmettiń koefısıenti  joǵary deńgeıge  jetedi.

«Biz  búdjet qarajatyn únemdeýge  múmkindik beretin  zamanaýı jáne  joǵary tehnologıaly qazandyqtarmen  jabdyqtaýǵa ázirmiz. Qazandyqtardy óz qarajattarymyzdyń esebin ornatyp jatqandyqtan, búdjet  jyl saıyn jylýǵa jumsap jatqan  shyǵynyn da únemdeıdi.  Osynyń barlyǵy  zamanaýı tehnologıanyń arqasynda oryn alyp otyr.  Bizdiń qazandyǵymyz patenttelgen.  Bul qazaqstandyq  ónertabys.  Biz Qazaqstan atynan  «EKSPO-2017»-ge qatysýshymyz. Qazandyqtarymyz  jasyl energetıka tek  jel qondyrǵysy ǵana emes ekenin is júzinde kórsetti.  Ol kómirdiń mol qory bolǵandyqtan, odan bas tartýdyń qajeti joq. Qorshaǵan ortany lastamaı-aq nysandardy   únemdi jylytý arqyly  kómirmen de jumys isteýge bolady. Biz aýany emes, ǵımaratty jylytamyz» ,-  deıdi Áltaıyr Syzdyqov.

Kásiporyn shyǵaratyn ónimderdiń  prototıpi nemistik jáne polshalyq qazandyqtar. Qumar Aqsaqalov osyndaı jobalardy   damytý qajettigin alǵa tartty.

«Bizdiń elimizde  óndirilgen energıanyń 70 paıyzy kómirden, 14 paıyzy  jel qýatynan, 10 paıyzy gazdan, 4 paıyzy  dızel otynynan alynady. Bizde qazir 21 ǵasyr. Ol – energetıka salasynda  silkinis  jasaıtyn ǵasyr. Prezıdentimiz osy jaıynda  aıtyp júr. Nege EKSPO ótkizip jatyrmyz?  Qazaqstan  qazir  osy ispen aınalysyp jatqandyǵyna  nazar aýdartqyzý úshin. Sizderdiń búgin osyndaı qazandyq shyǵaryp jatqandaryńyz   bizdiń durys jolmen kele jatqanymyzdy kórsetedi », - dedi óńir basshysy.

Oblys ákimi  qazandyqtyń eksporttyq áleýeti bolǵandyqtan,  atalmysh jobany  birlese alǵa jyljytý jaǵdaıyn qarastyrýdy  usyndy.

Shaǵalaly aýylynda óńir basshysy  «Soltústik Qazaqstan  aýyl sharýashylyǵy tájirıbe stansıasy» JSHS-niń  mal soıý  qosynyna soqty. Kásiporynnyń jumysymen seriktestik dırektory Belgibaı Qanafın tanystyrdy.  Onyń aıtýynsha,  kásiporyn bir táýlikte  5 iri qara mal soıa alady.

 Mundaı óndiristik mal soıý  veterıanarlyq-sanıtarlyq jaǵynan  ónimniń joǵary sapaly bolýyna  kepildik beredi jáne  alynǵan et óniminiń qaýipsizdigi boıynsha  barlyq talapty saqtaýǵa  jaǵdaı jasaıdy.

 «Muzdatyp qana satý kerek, onsyz almaıdy. Munda sertıfıkattalǵan  ónim ǵana bolýy kerek. Biz et óndirýdi kóbeıtýge  tıispiz, osyndaı sehtar salý arqyly  óńdep, saqtap jáne eksportqa shyǵarýymyz qajet. Bul – bizdiń mindetimiz»,- dedi Qumar Aqsaqalov.

Budan keıin  Aqqaıyń aýdanynyń ákimi Dáýren Baıtúleshev áleýmettik-ekonomıkalyq damý týraly aıtyp berdi.

«Biz 18 jáne 5  páterlik 2 turǵyn úıdi paıdalanýǵa berdik. Úı kezegindegiler sany – 247. Bıyl  taǵy 2 úı salý úshin  jobalyq-smetalyq qujattardy  ázirlep jatyrmyz. Avtomobıl joly boıynsha ótken jyly 507 mln. teńgeniń qarajaty ıgerildi. Bıyl  osy maqsatqa 817 mln. teńge josparlap otyrmyz.  Joldarymyzdyń 71 paıyzy  jaqsy jaǵdaıda.  Ótken jylmen salystyrǵanda  30 paıyzǵa kóbeıdi»,- dedi Dáýren Baıtúleshev.

Óńir basshysy  «Soltústik Qazaqstan  aýyl sharýashylyǵy tájirıbe stansıasy» JSHS-niń   dándi  jáne maıly daqyldar tuqymynyń kórmesimen tanysty. Qumar Aqsaqalov elıtalyq suryptar tuqymy óndirisin  kóbeıtý qajettigin  atap aıtty.  Belgibaı Qanafın   bul máselede   tuqym zańnamasy boıynsha shekteý qoıylǵanyn alǵa tartty.

 «Elıtalyq tuqym  bizge óte qajet.   Qalaı desek te elıta kólemin  ulǵaıtýǵa tıispiz.  Onyń ústine ózimizdiń tájirıbe stansıamyz bar.  Elıtalyq tuqymdy osynda óndirý kerek. Usynys jasańyz. Aýqymyn jáne alqabyn kóbeıtý úshin  mınıstrlikpen jumys isteıtin bolamyz. Iaǵnı  kásiporynnyń qýattylyǵyn  kóbeıtý boıynsha  maqsatty túrde jumys isteımiz»,- dedi  Qumar Aqsaqalov.

Jergilikti aýyl sharýashylyǵy taýarlaryn óndirýshiler  óńir basshysyn óz ónimderimen tanystyrdy.  Oblys ákimi agrarshylarmen  kóktemgi dala  jumystaryna ázirlik,  óńirdiń AÓK-nin damytýdaǵy ózekti máselelerdi talqylady.

«Sizderdiń alyp jatqan qarajatty  bárinen buryn  óndiristi keńeıtýge,  jermen jumys isteýdi jaqsartýǵa, adamdarǵa jaǵdaı jasaýǵa, oqýǵa jáne  eńbekaqy qoryn  kóterýge jumsaýdy  suraımyz. Basqasha jasaı almaımyz, onda  olar jumys istemeı qoıady. Adamdar óte sezimtal. Prezıdent:  «Adamdardyń jaǵdaıyn oılańdar»,-dep árdaıym aıtady.  Memleket sizderdiń   paıda tabýlaryńyzǵa jaǵdaı jasady,  endi  ony adamdarǵa berińizder.   Agrarshylyr  agrobıznespen aınalysý arqyly  baıyp,  adamdarǵa da jaǵdaı jasap  otyrǵandyǵy  jaıynda  birneshe mysal keltirýge bolady»,- dedi Qumar Aqsaqalov.

 Jumys saparynyń sońynda  oblys ákimi Aqqaıyń aýdanynyń aǵa býyn ókilderimen kezdesti.  Onda  aýdandy damytý jáne alǵan qoıǵan mindetter jaıly ózekti máseleler  talqylandy.