Astana qalasyn abattandyrý, kógaldandyrý jáne sanıtarlyq tazalaý boıynsha jumystardy ýaqytyly úılestirý maqsatynda 2017 jyldyń 15 sáýirinen 15 mamyryna deıingi kezeńde ekologıalyq aılyq ótkiziledi, dep habarlaıdy Qamshy aqparattyq agenttigi astana.gov.kz-ke silteme jasaı otyryp.
Onyń sheńberinde 29 sáýir men 13 mamyr kúnderi elordada «Biz taza qala úshin!» jalpyqalalyq senbilikterdi ótkizý josparlanǵan. Sondaı-aq, elorda ákiminiń tapsyrmasy boıynsha ekologıalyq aılyqty jáne jalpyqalalyq senbilikti ótkizý boıynsha shtab qurylyp, onyń quramyna qala ákiminiń orynbasarlary jáne qalalyq basqarmalar men qyzmetterdiń basshylary endi.
Ekologıalyq aılyq ótetin kezeńde bilim men densaýlyq saqtaý mekemelerine bekitilgen aýmaqtardy júıeli túrde tazartý, kógaldandyrý uıymdastyrylady. Sondaı-aq, sý nysandarynyń munaı ónimderimen, turmystyq jáne óndiristik qaldyqtarmen lastanýyn boldyrmaý maqsatynda atalǵan nysandardy turaqty baqylaýǵa alý kózdelgen.
Ekologıalyq aılyq barysynda jeke turǵyn úı oramdarynda turmystyq qaldyqtardy ortalyqtandyrylǵan jınaý jumystary qamtamasyz etiledi, qoǵamdyq kóliktiń sanıtarlyq jaǵdaıy tekseriledi.
Aýdandar ákimderiniń apparattary, qalalyq basqarmalar, komýnaldyq kásiporyndar bul jumystarǵa 100 myńnan asa adamdy, 4 452 memlekettik mekemeni tartýdy josparlap otyr. Ekologıalyq aılyqqa qatysatyn mekemelerdiń arasynda kásiporyndar, densaýlyq saqtaý nysandary, orta mektepter, JOO, qurylys uıymdary, shaǵyn jáne orta bıznes nysandary bar. Sonymen birge, 425 dana arnaıy tehnıka men 15 myńnan asa qural paıdalanylady. Senbilik barysynda qalanyń aýmaǵyn sanıtarlyq tazartý, aǵash kóshetterin otyrǵyzý, aýlalardy jáne oramishilik aýmaqtardy abattandyrý, shaǵyn arhıtektýralyq formalardy ornatý, trotýarlardy keńeıtý josparlanǵan.
Sondaı-aq, qalanyń barlyq aýdandarynda zańsyz qoqys oryndary joıylyp, qosymsha jaryqtandyrý tirekteri ornatylady, kósheler abattandyrylyp, asfált jabyny jańartylady.
Jalpy, qala boıynsha 6750 aǵash otyrǵyzý josparlanǵan, sonyń 1750-i iri kólemdi kóshetter bolsa, ashyq tamyrly 5000 ósimdik otyrǵyzylady.
Buǵan qosa, Esil, Aqbulaq, Sarybulaq ózenderiniń arnalaryn sanıtarlyq tazartý josparlanǵan, atalǵan jumystarǵa joǵary oqý oryndarynyń stýdentteri men áskerı bólimshelerdiń áskerı qyzmetkerleri tartylady.
Qala bıligi qalalyq jáne respýblıkalyq uıymdardyń qatysýymen aǵash otyrǵyzý sharalaryna, qalaǵa qosylǵan eldi mekenderdiń aýmaǵyn sanıtarlyq tazartýǵa erekshe nazar aýdarady.
Atap aıtqanda, «Almaty» aýdanynda Mıchýrıno turǵyn alabynda - 200 aǵash, Trıatlon parkinde - 100, Jeleznodorojnyı turǵyn alabynda 200 aǵash otyrǵyzylady, 2500 kóshetti kásipkerlerge taratý josparlanǵan.
Esil aýdanynda «Qaztransoıl» kompanıasy Uly Dala kóshesinde Turan dańǵylynan bastap Máńgilik El dańǵylyna deıin 1000 aǵash otyrǵyzýdy kózdep otyr, al «Operator ROP» kompanıasy Ǵashyqtar baǵynda 150 aǵash, Araı baǵynda 50 kóshet otyrǵyzbaq. Shyǵys Ilınka jáne Telman kentteri de qamtylady. Sarybulaq bulaǵy jaǵasynyń boıymen 250 aǵash otyrǵyzylady. Saryarqa aýdanynda kógaldandyrý jumystarymen Kóktal-1, Kóktal-2, Óndiris turǵyn alaptary da qamtylady.
