Ortalyq komýnıkasıalar qyzmetinde Qazaqstandaǵy kıikterdiń popýlásıasyn saqtaý úshin qoldanylǵan zamanaýı tehnologıalarǵa arnalǵan baspasóz konferensıasy ótti dep habarlaıdy Qamshy aqparattyq agenttigi QR ASHM Baspasóz qyzmetine silteme jasaı otyryp.
Baspasóz konferensıaǵa QR Aýyl sharýashylyǵy vıse-mınıstri Erlan Nysanbaev, QR Úkimetimen baılanys boıynsha «Kaspıı qubyr júrgizý konsorsıýmy» AQ bas dırektorynyń orynbasary Qaıyrgeldi Qabyldın, Qazaqstan bıoalýantúrlilikti saqtaý asosıasıasynyń atqarýshy dırektory Vera Voronova qatysty.
Kıikterdiń popýlásıasyn saqtaý maqsatynda «Kaspıı Qubyr Konsorsıýmy» aksıonerlik qoǵamy (budan ári – KQK) bólgen 20 mln teńgege Kaspıı mańy aımaǵyndaǵy janýarlarǵa spýtnıktik tańbalaýmen birge kıikterdiń moınyna taǵylatyn baý alynbaq. Jobany QR Aýyl sharýashylyǵy mınıstrliginiń qoldaýymen Bıoalýantúrlilikti saqtaý jónindegi qazaqstandyq asosıasıa iske asyrady.
Kıikterdiń aýrýdan jappaı qyrylýyn aıtpaǵanda, brakonerler de janýarlar popýlásıasynyń sanyna úlken zalal keltiredi. Sebebi, olar kóbine atalyq kıikterdi atyp alady. Búginde kıikterdi qorǵaýda dástúrli ádistermen qatar zamanaýı tehnologıalar da qoldanylýda. Máselen, sońǵy 7 jyl ishinde tabıǵatty qorǵaý uıymdary spýtnıktik baqylaý júıesin keńinen paıdalanyp keledi. Osynyń arqasynda, brakonerlik faktilerdiń sany eki ese qysqardy. Ótken jyly QR ASHM ınspektorlary brakonerliktiń 50 faktisin tirkep, kıikterdiń 1419 múıizi tárkilendi, al ústimizdegi jyldyń úsh aıynda 6 fakt tirkelip, kıiktiń 122 ushasy tárkilengen.
Kıikterdi qorǵaýdyń atalmysh ádistiń tıimdiligin eskerip, KQK “Globalstar” jáne «Iridium» spýtnıktik júıesi bar Sirtrack/Lotek úlgisindegi taratqyshpen qamtylǵan 30 baý satyp alýdy jón kórdi. Kıikterdiń moınyna kıgizilgen baýlar 2-2,5 jyldan keıin ózidiginen tarqatylyp, túsedi. Odan soń baýlardy qaıta qoldanýǵa bolady. Sonymen qatar, Iridium Collar G5C 175E (Solar Assist – Sirtrack) baýy qýatty sáýlelik panelden alady.
Kıikterdi ustap, olardyń moıyndaryna baý taǵý jumystaryn Qazaqstannyń Kaspıı teńizi mańyndaǵy kıik popýlásıasyn ósirý jáne saqtaý boıynsha birlesken baǵdarlamanyń operatory retinde Bıoalýantúrlilikti saqtaý jónindegi qazaqstandyq asosıasıasy qoǵamdyq qoryn júrgizedi. Atalmysh joba eki jyl ishinde kıikterdiń kóshý joldaryn anyqtap, baqylaýǵa, erekshe qorǵalatyn tabıǵı aýmaqtardyń damýyn josparlaý jáne qorǵaý tıimdiligin kúsheıtýge múmkindik beredi. Alynǵan málimetter kıikterdiń barlyq popýlásıalardaǵy aýrýlaryn zertteýge yqpal etpek.
Baspasóz konferensıa barysynda QR Aýyl sharýashylyǵy vıse-mınıstri Erlan Nysanbaev KQK kompanıasyna kórsetilgen qoldaý úshin alǵys aıtty. «Kıikterdi saqtaý máselesi – búginde basty mindetterimizdiń biri jáne máseleni sheshýge memleket, qoǵam men bıznes etene qatysý tıis», – dep málimdedi ol.
«KQK qyzmetin bastaǵan sátten Qazaqstan men Reseıde ekologıany damytýǵa baǵyttalǵan iri áleýmettik jobalardy júzege asyryp keledi. Óziniń qaıyrymdylyq qyzmeti aıasynda konsorsıým elimizdiń aımaqtarynyń damýyna 7,9 mlrd teńge quıdy. Biz budan bylaı da bıoalýantúrlilikti saqtaýǵa baǵyttalǵan yntymaqtastyqty jalǵastyryp, mundaı tabıǵatty qorǵaý sharalaryna demeýshilik kórsetýge ázirmiz», – dep «KQK» AQ Bas dırektorynyń QR Úkimetimen baılanys jónindegi orynbasary Qaıyrgeldi Qabyldın atap ótti.
Shara kezinde KQK, QR ASHM, Bıoalýantúrlilikti saqtaý jónindegi qazaqstandyq asosıasıasy arasynda aqparat, tájirıbe, bilim almasý jáne granttyq qoldaý usyný arqyly Qazaqstan Respýblıkasynyń bıoalýantúrliligin saqtaý, qalpyna keltirý jáne zertteý máseleleri boıynsha yntymaqtastyq týraly memorandýmǵa qol qoıyldy.
