Aqyn Talǵat Eshenuly Qazaqstan Respýblıkasy Prezıdenti Ákimshiliginiń İshki saıasat bólimi meńgerýshisiniń orynbasary bolyp taǵaıyndaldy dep habarlaıdy Qamshy.kz. Bul týraly saıasattanýshy Erlan Saırov áleýmettik jelide jazdy. 

Talǵat Eshenuly 1974 jyly 15 qazanda Shyǵys Qazaqstan oblysy (burynǵy Semeı oblysy) Aıakóz aýdany Tarbaǵataı aýylynda dúnıege kelgen. 1991 jyly Tarbaǵataı aýylyndaǵy Oktábr orta mektebin támamdaǵan soń, 1991-1996 jyldary Ál-Farabı atyndaǵy Qazaq ulttyq ýnıversıteti, jýrnalısıka fakúltetinde oqydy. 

1996-1997 jyldary halyqaralyq «Zaman-Qazaqstan» gazetinde, 1997-1998 jyldary «Jas alash» respýblıkalyq gazetinde tilshi, qoǵam jáne saıasat bólimniń meńgerýshisi bolyp qyzmet istedi. 1998-2004 jyldar aralyǵynda Qazaqstan Respýblıkasynyń Aqparat mınıstrliginde, Qazaqstan Respýblıkasynyń Mádenıet, aqparat jáne qoǵamdyq kelisim mınıstrliginde túrli jaýapty qyzmetter atqardy. 2004-2005 jyldar aralyǵynda «Jas alash» gazetiniń Astanadaǵy tilshiler qosynynyń jetekshisi boldy. 2005-2008 jyldary «Jas qazaq» respýblıkalyq qoǵamdyq-saıası gazetiniń bas redaktory qyzmetin atqardy. 2008-2009 jyldary QR Prezıdenti Ákimshiliginiń sektor meńgerýshisi. 2009-2010 jyldary «Nur Otan» partıasy tóraǵasynyń birinshi orynbasarynyń keńesshisi boldy. Buǵan deıin «Samuryq-Qazyna» Ulttyq ál-aýqat qory» aksıonerlik qoǵamynda bas menedjer bolyp qyzmet etken.

«Shabyt» halyqaralyq shyǵarmashylyq jastar festıvaliniń «ádebıet», «jýrnalısıka» nomınasıalary boıynsha (1999 jyl, 2000 jyl) jeńimpazy. J.Nájimedenov, T.Aıbergenov atyndaǵy syılyqtardyń laýreaty. QR Prezıdenti stıpendıasynyń (1999 jyl), «Daryn» memlekettik jastar syılyǵynyń ıegeri (2006 jyl). «Qazaqstan Respýblıkasynyń Táýelsizdigine 10 jyl» medalimen, «Abaı» halyqaralyq medalimen marapattalǵan.