QR Úkimet basshysy Saǵyntaev prezıdenttiń tapsyrmasymen AQSH-qa sapar jasady. Bul týraly Qamshy.kz QR Premer-Mınıstriniń baspasóz qyzmetine jáne Qazaqstan ulttyq arnasynyń «Apta» habaryna súıenip habarlaıdy.
QR Premer-Mınıstri Baqytjan Caǵyntaev «Chevron», «Citigroup», «Bloomberg», «WRBerkley Group», «GE Transportation», «OSI Systems», «Pfizer», «Cisco», «Robomatter Inc.», «IBMWatson» ortalyǵy, «Autodesk», «Tesla Motors», «Bridge West Group», «Learn Capital», «SoundHound», «Uber», «DFJ», «Silicon Valley Innovation Center», «Plug and Play Tech Center», «Google», «Jabil» jáne «Microsoft» ókilderimen kezdesti.
İT-tehnologıalar, mashına jasaý, energetıka, taý-ken, hımıa, tamaq jáne óńdeý ónerkásibi, telekomýnıkasıalar, bolashaqtyń kóligi, qurylys, bilim berý, densaýlyq saqtaý jáne ómir sapasyn jaqsartý salalarynda yntymaqtastyq ornatý máseleleri talqylanady.
Qazaqstan Premer-Mınıstri B. Saǵyntaevtyń kestesindegi alǵashqy kezdesýlerdiń biri AQSH-tyń asa iri qarjy ınstıtýttarynyń «Citigroup», «Mastercard», «Berkley», «MorganStanley», «Black Rock», «Goldman Sachs», Moody’s, Standard&Poor’s jáne Fitch álemdik reıtıńtik agenttikteriniń, sondaı-aq Greylock Capital, American International Group, Guggenheim International, Alliance Bernstein, Public Capital Advisors, Business Council ofInternational Understanding kompanıalarynyń ókilderimen júzdesýi boldy. Álemdik ekonomıkany jáne Qazaqstannyń ekonomıkalyq saıasatyn damytýdyń ózekti máseleleri, sondaı-aq birlesken jobalardy júzege asyrý, ınvestısıalar tartý, ınfraqurylymdyq jobalardy qarjylandyrý jáne aktıvterdi basqarý múmkindikteri talqylandy.
AQSH-qa jumys sapary aıasynda QR Premer-Mınıstri Baqytjan Saǵyntaev Nú-Iorktiń eks-merleri Rýdolf Djýlıanı jáne Maıkl Blýmbergpen kezdesti. Kelissózder barysynda telekomýnıkasıalyq ınfraqurylymdy damytý salasyndaǵy, sondaı-aq «Astana» Halyqaralyq qarjy ortalyǵyn damytý salasyndaǵy yntymaqtastyq máseleleri talqylandy. Budan ózge, ótkizilgen kezdesýlerdiń mańyzdy nátıjesi Astanada «Bloomberg» telearnasy men keńsesin ashý týraly kelisim boldy.
Sondaı-aq, Baqytjan Saǵyntaev AQSH-tyń jetekshi kompanıalarymen: «I Scuared Capital», «General Electric», «Grace, Robotti & Company Advisors», «AGCO», «AES», «Black and Veatch», «American Industrial Acquisition Corporation» Qazaqstan ekonomıkasyna ınvestısıalar men jańa tehnologıalar tartý máselelerin talqylady.
Budan ózge, «OSI Systems», «Pfizer» jáne «GE Transportation» kompanıalarymen kezdesýler aıasynda Qazaqstanda tehnologıalyq jabdyqtar óndirisine ınvestısıalar tartý týraly, al «Rahal Foods» kompanıasymen organıkalyq azyq-túlik óndirisin iske qosý týraly kelisim jasaldy.
İri IT-kompanıalarmen kelissózder barysynda Qazaqstan úshin mańyzdy birqatar Memorandýmǵa qol qoıyldy. Atap aıtqanda «Zerde» AQ men «Cisco» kompanıasy arasynda yntymaqtastyq ornatý týraly memorandýmǵa qol qoıyldy, onyń aıasynda Cisco Qazaqstanda pılottyq jobalardy (memlekettik qyzmetterdi qashyqtyqtan kórsetýge arnalǵan ózine-ózi qyzmet kórsetý dúńgirshekteri, Cisco jelilik akademıasy, «sıfrlyq ken orny», IoT-jelisi, Smart Lighting jáne t.b.) iske qosýdy qarjylandyrýǵa daıyn.
QR Premer-Mınıstriniń «IBM Watson West» ortalyǵyn aralaý qorytyndysy boıynsha «IBM» kompanıasy men «ITP» DKQ arasynda Astana qalasyndaǵy startap-hab aıasynda kelesi baǵyttar: qarjylyq tehnologıalar, «Aqyldy qala» boıynsha tehnologıalar jáne qala qurylysy men paıdalanýdy basqarýǵa arnalǵan tehnologıalar boıynsha qoldanbaly zertteýlerge arnalǵan zerthana qurý boıynsha Memorandýmǵa qol qoıyldy.
Sondaı-aq, Baqytjan Saǵyntaev «Autodesk» vıse-prezıdenti Devıd Kreınmen kezdesti. Taraptar Qazaqstanda Autodesk quzyret ortalyǵyn qurýdy talqylady, onyń aıasynda BIM (Building Information Modeling – ǵımaratty aqparattyq úlgileý) salasynda sıfrlyq standarttar engiziledi. Kompanıany aralaý nátıjeleri boıynsha «Autodesk» pen «ITP» DKQ arasyndaǵy yntymaqtastyq týraly Memorandýmǵa qol qoıyldy. Sondaı-aq, «Autodesk» kompanıasynyń qazaqstandyq qurylys materıaldarynyń sapasyn anyqtaý jáne sertıfıkattaý zerthanasyn qurýǵa qatysýy qarastyrylǵan.
QR Premer-Mınıstri «Bridge West Group» Dırektorlar keńesiniń Tóraǵasy Ması Taebımen kezdesý ótkizdi, onyń qorytyndysy boıynsha «Qazaqtelekom» AQ-men ózara túsinistik týraly Memorandýmǵa qol qoıyldy, onda Internetke qoljetimdilik jelilerin aýqymdy damytý maqsatynda amerıkalyq kompanıanyń jabdyqtaryn satyp alý boıynsha múmkin yntymaqtastyq kózdelgen.
Sodan keıin «Learn Capital» Basqarýshy seriktesi G. Maýromen kezdesý ótti, onyń qorytyndysy boıynsha QR BǴM «Aqparattyq-analıtıkalyq ortalyq» AQ-men «charterlik mektepter» dep atalatyn úlgi boıynsha ınovasıalyq bilim berýdiń pılottyq jobasyn damytý boıynsha yntymaqtastyq týraly Memorandýmǵa qol qoıyldy.
B. Saǵyntaev «Sound Hound» kompanıasynyń tóraǵasy K. Mohaermen kelissózder júrgizdi, ol aqparattyq tehnologıalar salasyndaǵy birlesken jobalardy iske asyrýda Qazaqstannyń áleýetti seriktesi bolýy múmkin.
AQSH-qa jumys sapary barysynda QR Premer-Mınıstri «Robomatter Inc.» prezıdenti Skıp Smıtpen kezdesti, onyń barysynda kompanıanyń ınovasıalyq bilim berý baǵdarlamalaryn Qazaqstanda qoldaný múmkindigin talqylady.
QR Premer-Mınıstri Baqytjan Saǵyntaev «Tesla Motors» keńsesin aralap, kompanıa ókilderimen mashına jasaý, elektromobıl óndirisi, sondaı-aq avtokólikti ushqyshsyz basqarýdy engizý salalaryndaǵy ınovasıalyq tehnologıalardy talqylady. Budan ózge, «Tesla Motors» aralaý aıasynda «Qazatomónrekásip» kompanıasymen jańartylmaly energıa kózderi salasyndaǵy múmkin yntymaqtastyq boıynsha naqty usynystar tapsyryldy.
Budan keıin Baqytjan Saǵyntaev «Shevron» kompanıasynyń tóraǵasy Djon Ýotsonmen kelissóz ótkizdi, onda munaı ónimderiniń álemdik naryǵyn damytýdyń qazirgi jaǵdaıy men boljamdary, elimizdegi munaı-gaz jobalaryndaǵy yntymaqtastyqty keńeıtý máseleleri talqylandy.
B. Saǵyntaev «Uber» keńsesine baryp, kompanıanyń jahandyq saıasat jáne ekonomıka jónindegi basshysy B. Masıellomen kezdesý ótkizdi. «Uber» - taksı nemese jeke júrgizýshilerdi izdeý, shaqyrý jáne aqysyn tóleýge arnalǵan mobıldik qosymshany iske qosqan, San-Fransıskoda qurylǵan amerıkalyq, halyqaralyq kompanıa. 2016 jyldyń málimetterine sáıkes, mobıldik qosymsha arqyly qyzmet kórsetý álemniń 70-ten astam elinde qoljetimdi bolǵan.
QR Premer-Mınıstri startap-jobalarǵa qoldaý kórsetýmen aınalysatyn iri «DFJ» kompanıasynyń keńsesine baryp, onyń negizin qalaýshy T. Drapermen kezdesý ótkizdi. «DFJ» birqatar qazaqstandyq kompanıalarǵa qoldaý kórsetýge nıetti. «DFJ» kompanıasy tehnologıalar salasyndaǵy damý satysyndaǵy jáne bastapqy satydaǵy jobalarǵa ınvestısıa quıýǵa baǵdarlanǵan. Osyndaı iri kompanıanyń qoldaý kórsetýi Qazaqstanda sıfrlyq jáne aqparattyq tehnologıalar damıtyn ekonomıka salalaryndaǵy bıznesti damytý men ınvestorlardy tartýdyń alańyna aınalatyn AIST HUB İT-startaptardyń halyqaralyq tehnoparkin qurý turǵysynan alǵanda óte mańyzdy.
QR Premer-Mınıstri Kremnıı alqabynyń ınovasıalyq ortalyǵynyń keńsesine baryp, sarapshylar tobymen jáne ortalyq prezıdenti A. Kýnovpen kezdesti. Inovasıalyq ortalyq Kremnıı alqabynyń kóshbastaýshy kompanıalarynyń basshylyǵymen, iri venchýrlik qorlarmen jáne ınvestorlarmen, tabysty kásipkerlermen, iskerlik jáne qoǵamdyq elıta ókilderimen tyǵyz baılanysta jáne taǵylymdama, sheberlik-synyptary men bıznes-týrlarmen qamtamasyz etedi.
B. Saǵyntaev «Plug and Play Tech Center» kompanıasynyń basshylyǵymen jáne startaptarmen birqatar kezdesýler ótkizdi. Aıta ketý kerek, «Plug and Play Tech Center» - startaptardy damytýǵa mamandandyrylǵan bıznes-akselerator. Ol 300-den astam startaptardy biriktiredi jáne atalǵan ınkýbatordyń qorǵaýyndaǵy kompanıalardy irikteýge júıeli túrde qatysatyn 170-ten astam ınvestormen seriktes.
Odan keıin QR Premer-Mınıstri «Jabil» kompanıasynyń keńsesine bardy, ol túrli salalardaǵy jahandyq tehnologıalyq korporasıalarǵa elektronıkalardy jobalap, ázirleý boıynsha keshendik qyzmetter kórsetetin álemdegi eń iri óndiristik kompanıalardyń biri. Onyń klıentteriniń arasynda Apple, Facebook, Microsoft, Cisco sekildi dúnıejúzilik kompanıalar da bar.
Kompanıa elektrondy ónimderdi naryqqa jyldamyraq shyǵarýǵa kómek kórsetedi jáne ónimderdiń kúlli álem boıynsha jetkizilýin basqarady. Jabil-diń jobalaý, óndiris jáne ónimdi jetkizý tizbegin zıatkerlik basqarý sheshimderi mashına jasaý salasynda da qyzyǵýshylyq týdyrady. Osyǵan uqsas kompanıalarmen yntymaqtastyq ornatý QR Prezıdenti N. Nazarbaevtyń Ekonomıkany úshinshi jańǵyrtý boıynsha bergen tapsyrmalaryn oryndaý aıasynda Qazaqstan úshin úlken mańyzǵa ıe.
San-Fransıskoda Baqytjan Saǵyntaev «Google» keńsesine bardy, onda kompanıanyń İT-salasyndaǵy qazirgi ázirlemelerimen tanysty, qyzmetkerlermen Qazaqstanǵa qajetti jobalardy talqylady. Olardyń ishinde: Real Time Speech Translation jáne Project Loon baǵdarlamasy bar, onyń aıasynda erekshe áýe sharlary stratosfera bıiktiginde turyp, jerdegi tutynýshylarǵa, ásirese, alys shalǵaıdaǵy eldi meken halqyna ınternet jibere alady.
Sondaı-aq, Qazaqstan Premer-Mınıstri «Microsoft» korporasıasynyń ujymdyq vıse-prezıdenti D. Levınmen kezdesý ótkizdi. Kezdesý barysynda kompanıanyń baǵdarlamalyq sheshimderin QR-nyń shaǵyn jınaqty mektepterine engizý máselesi talqylandy. Shaǵyn jınaqty mektepterdiń sapasyn jaqsartý men aýyl jáne qala mektepteri arasyndaǵy bilim berý deńgeıin teńestirýge tek qana oqytýdyń zamanaýı ádistemelerin qoldanyp, aqparattyq-kommýnıkasıalyq tehnologıalardy engizý arqyly qol jetkizýge bolady. Osyǵan oraı Bilim Book arnaıy qurylǵysyn ázirleý jumystary júrgizilýde, al kompúter devaısynyń óndirisi atalǵan saladaǵy álemdik kóshbasshylar Lenovo men Dell kompanıalary arqyly júzege asyrylady. Barlyq baǵdarlamalyq qamtamasyz etýmen Microsoft kompanıasy aınalysady.
Amerıkalyq iskerlik jáne sarapshylar ortalarynyń ókilderi Qazaqstan Prezıdenti N. Nazarbaevtyń Qazaqstandy turaqty ekonomıkalyq ósimmen jáne jańǵyrtýmen qamtamasyz etý jónindegi, sonymen qatar elimizdiń ınvestısıalyq tartymdylyǵyn arttyrý men ártaraptandyrý týraly saıasatyn joǵary baǵalady.
«Qazaqstan álemdik syn-tegeýrinder men kúrdeli máseleler aldynda eshqashan sheginshektemegen. El basshylyǵy durys baǵytty ustanǵan», - dedi Halyqaralyq ózara túsinýshilik jónindegi Bıznes-Keńestiń bas dırektory Pıter Tıchanskı.
«Investorlar QR Prezıdenti N. Nazarbaevtyń Qazaqstannyń úshinshi jańǵyrýy, 5 ınstıtýsıonaldyq reforma, «100 naqty qadam» Josparyna asa bir jigermen qaraýda», - dedi «American International Group» saqtandyrý korporasıasynyń bas dırektory Ashok Paramesvaran.
«Qazaqstan úlken reformalar júrgizýde. Bul jańa shynaıylyqtaǵy durys sheshim», - dedi tanymal ekonomıs A. Laffer.
Óz kezeginde, Nú-Iork qalasynyń eks-meri R. Djýlıanı elimizdiń geosaıası ornalasqan jerin eskere otyryp, Qazaqstannyń AQSH úshin úlken mańyzǵa ıe ekenin aıtty.
