Qazaq memlekettik qyzdar pedagogıkalyq ýnıversıteti Áleýmettik-gýmanıtarlyq fakúltetiniń Qazaqstan tarıhy kafedrasy Alash Ordanyń 100 jyldyǵy aıasynda Almaty qalasyndaǵy joǵary oqý oryndarynyń stýdentteri arasynda «Alash qozǵalysy: tarıhy men taǵlymy» atty ıntellektýaldy olımpıada ótkizdi dep habarlaıdy Qamshy aqparattyq agenttigi.
Bul sharanyń negizgi maqsaty – ultynyń azattyǵy men teńdigi úshin aıanbaı qyzmet etken Alash qaıratkerleriniń ónegeli isteri men jalyndaǵan ǵumyrlaryn eliniń jarqyn bolashaǵyna arnaǵan ómir jolyn, júregi men aqylynan týǵan kórkem oılaryn, dúnıetanymyn, Alash qozǵalysynyń taǵylymyn nasıhattaý. Jas urpaqqa Alash zıalylarynyń azattyq úshin kúresken jyldarynyń salmaǵy men baǵasyn uǵynýǵa yqpal jasaý arqyly táýelsizdigimizdiń mánin sezinýge tárbıeleý, stýdentterdiń sanasynda óz eline degen maqtanysh pen patrıottyq sezimdi qalyptastyrý.
Olımpıadanyń ashylý rásiminde sóz alǵan Áleýmettik-gýmanıtarlyq fakúltetiniń dekany, t.ǵ.k., dosent Jamal Áshirbekova el bolashaǵynyń jarqyn bolýy rýhy asqaq, óresi bıik, bilimdi de talantty jastardyń qolynda ekendigin basa túsindirip ótti. Uıymdastyrylǵan bilim dodasy stýdent jastardyń óz eliniń tarıhyna qurmetpen qarap, otansúıgishtik pen ultjandylyqqa tárbıeleıtin sharalardyń biri ekendigine toqtalyp, qatysýshy toptarǵa tabys pen sáttilik tiledi.
Olımpıadaǵa ál-Farabı atyndaǵy Qazaq Ulttyq ýnıversıteti «Alash urpaqtary» komandasy, S.J.Asfendıarov atyndaǵy QazUMÝ «Ibn-Sına izbasarlary» komandasy, Almaty tehnologıalyq ýnıversıteti «Alash amanaty» komandasy, Almaty ýnıversıtetiniń «Báıterek» komandasy, Qazaq bas sáýlet-qurylys akademıasynyń «Nomad» komandasy, Qazaq memlekettik qyzdar pedagogıkalyq ýnıversıtetiniń «Aq tumar» komandasy qatysty.
Intellektýaldy dodada baq synasqan qatysýshy toptar bes aınalymnan turatyn arnaıy suraqtar men tapsyrmalarǵa belsene jaýap berip óz bilimderin synady.
İ aınalym – tanystyrýda ár komanda kapıtany óziniń ýnıversıteti men múshelerin tanystyryp, komandanyń atyn qorǵasa, İİ «Uıashyqtar qupıasy» aınalymynda ár komanda uıashyqtarda jasyrylǵan Alash qaıratkerleriniń ómiri, qoǵamdyq-saıası qyzmeti men Alash partıasy tarıhynyń negizgi kezeńderine baılanysty suraqtarǵa jaýap berdi. Beıne suraqtan turatyn İİİ aınalymda elimizge tanymal ǵalymdar vıdeo formatynda qatysýshy toptarǵa «Alash qozǵalysy: tarıhy men taǵlymy» taqyrybyna qatysty arnaıy saýaldar qoıdy. İV «Altyn qaqpa» aınalymynda ár komanda Alash qaıratkerleriniń ómiri, qoǵamdyq-saıası qyzmeti men Alash partıasy jáne Alash Orda úkimeti tarıhyna qatysty úsh deńgeıli tarıhı termınderge anyqtama berdi. 1-deńgeı «qola qaqpa», 2-deńgeı «kúmis qaqpa», 3-deńgeı «altyn qaqpa» dep ataldy. Tolyq jaýap bergen komanda ǵana qaqpadan ótý múmkindigine ıe boldy. Úshinshi qaqpanyń suraǵy aǵylshyn tilinde qoıyldy. Bul saıysta saıyskerlerdiń sóıleý máneri, sheshendigi, faktilerdi qoldanýy basty nazarǵa alyndy. Al, sońǵy, V «Oı tolǵaý» aınalymynda komanda músheleri arnaıy jáshikte ne jasyrylǵanyn taýyp, taqyrypqa qatysty maǵlumat berdi.
Almaty qalasyndaǵy joǵary oqý oryndarynyń stýdentteri arasynda ótkizilgen ıntellektýaldy olımpıadanyń qorytyndysy boıynsha: S.J.Asfendıarov atyndaǵy QazUMÝ «Ibn-Sına izbasarlary» komandasy I oryn, Almaty tehnologıalyq ýnıversıteti «Alash amanaty» komandasy II oryn, Almaty ýnıversıteti «Báıterek» jáne Qazaq bas sáýlet-qurylys akademıasy «Nomad» komandalary İİİ oryndy ıelendi. Barlyq jeńimpazdar komandalar maqtaý qaǵazdarymen jáne arnaıy syılyqtarmen marapattaldy.
Qazaqstan tarıhy kafedrasynyń meńgerýshisi, t.ǵ.k. Aınagúl Qaıypbaeva: «Dana halqymyz «Qazaqstan tarıhy páni boıynsha ótken dástúrli ıntellektýaldy olımpıada barysynda stýdent jastar myńdy jyǵar jan-jaqty bilimderimen osy qanatty sózdiń tarıhı mańyzyn kórsete bildi», dep atap ótti.
Almaty tehnologıalyq ýnıversıteti «Alash amanaty» komandasynyń jetekshisi, t.ǵ.k., dosent K.B.Ahataeva bilim saıysyna qatysýshy jastardyń ıntellekteriniń jyldan jylǵa ósip kele jatqandyńynyń kýási bolyp otyrǵandyǵyn aıtyp, sharanyń mańyzdylyǵyn ashty.
Ýnıversıtet qabyrǵasynda Qazaqstan tarıhy páni boıynsha dástúrli túrde uıymdastyrylatyn bul is-shara jas urpaqtyń patrıottyq sezimderin oıatyp qana qoımaı, el tarıhyn nasıhattaýda úlken ról atqaratyndyǵyna senimimiz mol.
