Mundaı jaǵdaı áli kúnge deıin bolmaǵan. Polısıa bólimshesine dálel retinde Radıonovsk kóshesinde ornalasqan dúkennen 50 kelilik qant jetkizildi. Qant toly qaptyń ishinen «qutqaryńyzdar, biz quldyqtamyz» dep jazylǵan qaǵaz shyqty, dep habarlaıdy kp.ru basylymy. Málimettiń qazaqsha nusqasyn Qamshy aqparattyq agenttigi oqyrman nazaryna usynady.

Biz degeni kimder? Naqty qaı jerde? Barlyǵy belgisiz, eshqandaı adamnyń tegi, telefon nómiri kórsetilmegen. Alǵashynda tergeýshiler muny bireýdiń qaljyńy dep oılaǵan. Alaıda dúken qyzmetkerleriniń aıtýynsha, ondaǵy adamnyń eshqaısy mundaı habarlama jazyp, qapqa salmaǵan. Keıinnen Kýrsk oblysyndaǵy qant jetkizýshi adamdarmen habarlasyp, mundaı qaǵazdyń qaptyń ishine qalaı túskendigi jaıynda anyq-qanyǵyn bilmek bolǵan.

Belgili bolǵandaı, dúkenge qantty aptasyna bir ret alyp keledi eken. Ony kondıter sehynda túrli tátti toqashtar men torttardy pisirýge paıdalanady. 50 kelilik bir qap qant bitkennen soń kondıter qyzmetshisi ekinshi qapty ashyp, ishinen sur tústi qaǵazdy taýyp alǵan. Dúken qyzmetkerleriniń aıtýynsha, bul jerge jetkiziletin qanttyń syrtynda únemi aqparat jazylǵan qaǵaz bolatyn, alaıda dál osy qapqa mundaı qaǵazdy jabystyrýdy umytyp ketken eken.

12 sáýir kúni oqıǵa oryn alǵan jerge quqyq qorǵaý organdary kelip, tergeý jumystaryn júrgizipti. Tártip saqtaý qyzmetkerleri «Kollektıvıst» dep atalatyn qant zaýytynyń ujymyn tergep, barlyq qoımalardy tekserip, aınalany túgelimen sholyp shyqqan. Degenmen, quldyqta júrgen eshbir adam tabylmapty. Sonymen qatar, bul jerde jumys isteıtin adamdardyń sany da az eken.

«Munda qant óndirý jumystary merzimdi bolyp keledi jáne zaýyt qyzmetkerleri ony qysta toqtatyp qoıǵan, demek bul ónimderdiń turǵanyna bir jyldaı ýaqyt bolǵan. Sonymen qatar, qantty bul jerge basqa jerden de alyp kelýi ábden múmkin, al syrtyndaǵy japsyrma qaǵazy Kýrsktiki. Al, Lúbımovkada oranalsqan qant zaýytyna qatysty aıtatyn bolsaq, bul jer birneshe ýaqyttan beri jumys istep kele jatyr, ujymy turaqty, olardyń arasynda eshqandaı da kelimsekter joq, bári de jergilikti turǵyndar. Bul jerge jumysqa kirý sonshalyqty ońaı da emes», - dep málimdedi quqyq qorǵaý organy.

Endigi kezekte, quqyq qorǵaýshylar kómek surap jazǵan adamnyń kim ekenin jáne qashan taratqandyǵyn izdestirýde. Habarlamanyń jazylǵanyna tym uzaq ýaqyt bolýy da ábden múmkin.

«Kollektıvıst» atty qant zaýyty Kýrsk oblysy, Bolshesoldat aýdanyndaǵy Lúbımovka aýylynda ornalasqan. Jaqynda ǵana zaýyttyń basshylyǵy aýysqan bolatyn. Eks-basshysy Kýrsk oblysynyń iri kásipkerleriniń biri bolatyn, alaıda birneshe kún buryn «Ivolga-sentr» kompanıasy daǵdarysqa ushyraǵan. Birneshe mıllıard qaryzǵa kirgen kompanıa aqshany reseılik bankterden jáne shotlandıalyq Royal Bank of Scotland bankinen alǵany belgili boldy.

«Biz polısıaǵa aryz jazdyq. Qant salynǵan qap dúkennen tárkilenip, zertteý jumystary bastaldy», - dep málimdedi dúken basshylyǵy.

Aýdarǵan: Nazerke Labıhan