Qazaqstannyń Komýnıstik partıasy ishten búlinip jatyr. Búgin Almaty qalasynda baspasóz májilisin ótkizgen partıa múshesi Alpamys Bekturǵanov osylaı málimdedi.
«Meni óz partıamnyń taǵdyry alańdatady. Qazaqstannyń Komýnıstik partıasy ishteı búlinip jatyr. Partıanyń keıbir músheleri ony qulatyp tynbaqshy. Bir ókinishtisi, osy búlikshiler búginde partıanyń bıligin qolyna alǵan. Men QPK Ortalyq komıtetiniń hatshylary Vasılıı Shamın men Tóleýbek Mahyjanov jaıynda aıtyp otyrmyn. Olar azamattardyń basyn aınaldyryp, Ortalyq komıtetke teris aqparat berip keledi. Sondaı-aq, partıa kóshbasshysy Ǵazız Aldamjarovty da aldap, oǵan jalǵan málimetterimen aldap otyr» deıdi Alpamys Myńǵazyuly jýrnalısermen bolǵan áńgime barysynda. Onyń aıtýynsha, Mahyjanov Shamınniń qýyrshaǵy ispettes. Iaǵnı, ol áriptesiniń qolymen talaı tirlikti tyndyryp otyrǵan kórinedi. «Shamın óziniń partıaǵa jetekshilik ete almaıtynyn biledi. Sondyqtan partıa tóraǵalyǵyna úmitker retinde Tóleýbek Mahyjanovty daıyndady. Meniń bilýimshe, Mahyjanov Semeıdegi partıa fılıalynan barlyq qyzmetkerdi qýyp tynyp, qazir qalalyq uıym ómir súrýin toqtatqan. Bul eki adam partıadaǵy bılikti óz qoldaryna aldy. Osyny paıdalanǵan Mahyjanov meni partıa qatarynan qýyp otyr. Kompartıanyń bolashaǵy bulyńǵyr, meniń janyma batatyny da osy» dep aǵynan jaryldy A.Bekturǵanov. Ol partıalastyryna birigip, uıymda oryn alyp jatqan zańsyzdyqtarǵa qarsy kúresýge shaqyrdy.
Qamshy-aqparat
