Prezıdenttiń sý tasqynynan zardap shekken aımaqtarǵa el bolyp kómektesýge shaqyrǵan úndeýine eldiń ár túkpirinen qoldaý kórsetilýde, dep habarlaıdy Qamshy AA.
Qazaqstan Respýblıkasy Parlamenti Senatynyń depýtattary sý tasqynynan zardap shekkenderge bir kúndik eńbekaqysyn aýdaratynyn habarlaǵan edik.
Senat depýtattarynyń bul bastamasyn Májilis depýtattary da qoldap, bir kúndik eńbekaqylaryn sý tasqynynan zardap shekken aımaqtarǵa kómek retinde aýdarýǵa sheshim qabyldady.
Ulttyq Olımpıada komıteti de ózderiniń bir kúndik eńbekaqylaryn Aqmola oblysynda sý tasqanynan zardap shekkenderge kómek retinde aýdardy. Olardyń bul bastamasyn quramyna birneshe sport federasıalary kiretin Sporttyq jekpe-jek Konfederasıasy da qoldap otyr.
Sonymen qatar, «Astana opera» qyzmetkerleri de ózderiniń bir kúndik jalaqylaryn Qaraǵandy oblysynda sý tasqynynan zardap shekkenderge kómek retinde aýdarmaqshy. Bul týraly teatr baspasóz qyzmeti habarlady.
Habarlamada: « Teatr akterleri Astanada «Jas Otan» jastar qanaty qurǵan sý tasqynynan zardap shekkenderge kómek shtabyna tamaq pen kıim aparyp berdi», - delingen.
Respýblıkalyq advokattar kollegıasy óz saıttarynda sý tasqynynan zardap shekken azamattarǵa tegin keńes berýge daıyn ekendikterin málimdedi.
Málimdemede: «Sý tasqynynan zardap shegýshilerge zańdyq kómekte qajet», - delingen. Tegin keńes berý kezinde tómendegi suraqtarǵa jaýap alýǵa bolady.
- Zardap shekenderge úı-jaılarynyń memlekettik qordan qaıtarylyp berilýi;
- Qarjylaı kompensasıalardyń tolyq ótelýi;
- Zardap shekken azamattardyń densaýlyqtaryn ońaldyrýǵa kómek berilýi.
Qazaqstannyń birqatar oblystary da gýmanıtarlyq kómek jiberýde. Qostanaı oblysy 23 sáýir kúni 100 tonna gýmanıtarlyq kómek jiberýge daıyndap jatyr. Atyraýlyq belsendiler 70 tonna gýmanılarlyq kómekti Qaraǵandy oblysyna jiberdi. Sonymen qatar, aımaqtarǵa Astana, Almaty, Aqtaý qalalarynan da gýmanıtarlyq kómek kólikteri jiberildi.
Esterińizge sala keteıik, Úkimet zardap shekken aımaqtarda qaıta qalpyna keltirý jumystaryn júrgizý úshin el búdjetinen 1 mlrd. teńge bólinetinin habarlaǵan.
Tasqynnan zardap shekken Aqtóbe, Qostanaı, Soltústik Qazaqstan oblystarynda qaıyrymdylyq qorlary quryldy. Eriktiler kıimder men azyq-túlik jınaýǵa kóshken.
Sý tasqyndarynyń negizgi sebebi eldi mekenderdiń ákimdikterinde sý basýǵa daıyndyq boıynsha basqarýshy qujattardyń, sý basýy múmkin aımaqtan halyqty kóshirý josparynyń, qulaqtandyrý júıesiniń joqtyǵy nemese olardyń jumys istemeýiniń, sonymen qatar kóshirýge arnalǵan ınjenerlik tehnıka men avtokólikterdiń ahýaly tómendigin taǵy bir márte dáleldedi.
Bul jaǵdaılardyń barlyǵy gıdrotehnıkalyq qurylystardaǵy sý ótkizý qabiletiniń tómendigin, olardyń qardan tolyq tazalanbaǵandyǵyn, kúzdegi sý qoımalaryn qurǵatý sharalarynyń durys júrgizilmegendigin tanytty.
El basyna túsken bul qıyndyqtan birlesip shyǵamyz. Qaıyrymdy jandardyń isterin qoldaýshylar qatary kóbeıedi degen nıettemiz.
