Óńir basshysy Qumar Aqsaqalov pen «Nur Otan» partıasynyń hatshysy Farhad Qýanǵanov Ǵ.Músirepov atyndaǵy aýdannyń  Sharyq ózeniniń deńgeıi kóterilýinen sý arnasynan shyǵyp 157 úıdi basqan úsh eldi mekende boldy dep habarlaıdy Qamshy AA. Onda dúısenbiden beri tótenshe jaǵdaı. 

Rýzaevka aýylynda oblys ákimi sýdan zardap shekken  jergilikti turǵyndarmen kezdesti.

- Eshkim de óz máselesimen jeke qalmaıdy. Komısıa jumys istep jatyr, olar árbir úıde boldy. Qazir biz shyǵynnyń kólemin anyqtaýymyz kerek, ótemaqy boıynsha másele sosyn sheshiledi. Sizderdiń máselelerińizdi sheshýge kómektesetinimizdi bilýlerińiz kerek. Qazir  qoǵamdyq uıymdardyń shottaryna  aqsha túse bastady, barlyq jaqtan kómek kelýde. Az ýaqyttyń ishinde barlyǵyna ótemaqy tóleımiz jáne kómektesemiz. ,- dedi Qumar Aqsaqalov.

«Nur Otan» partıasynyń hatshysy Farhad Qýanǵanov osy jerde  qalyptasqan jaǵdaıdy baıqaý úshin Astanadan arnaıy kelgenin de atap aıtty óńir basshysy zardap shekkendermen áńgime barysynda.

 - Jaǵdaıdy baqylaýda ustaımyz dep sizderdi sendiremin. Barlyq máselelerińiz eskeriletin bolady. Sizder úshin aýdannyń, oblystyń basshylary, Qazaqstannyń barlyq óńirleri alańdap otyr,- dedi Farhad Qýanǵanov

Oblys ákimi ótemaqy tóleýdiń jaǵdaıy týraly da aıtyp ótti.

- Sizder turatyn oryndar daıyndaımyz jáne bir jarym aıdyń ishinde aqsha máselesin sheshemiz. Onda anyqtalǵan tártip bar. Saqtalýǵa tıis ereje men belgilengen komısıa bar, keltirgen zalaldy anyqtaýǵa shynshyldyqpen qaraımyz. Aqshaǵa keletin bolsaq, ony bólip bermeımiz, birden tóleımiz. Úıleri tolyq buzylǵan turǵyndarǵa turǵyn úıdiń quny óteletin bolady, baǵalaý  komısıalyq turǵyda bolady,- dedi Qumar Aqsaqalov.  

Kóptegen turǵyndar  jergilikti atqarýshy organdarǵa, qutqarýshylar men polısıa qyzmetkerlerine, tabıǵı apatty jeńýge kómek kórsetkenderdiń barlyǵyna jáne onyń zardaptaryn  joıýǵa kómektesip jatqandarǵa alǵystaryn bildirdi. 

Rýzaevka aýylynyń turǵyndaryn sý taǵy da keledi dep tynyshsyzdanýdyń qajeti joq ekendigine sendirdi. Úıleri saý qalǵandar baspanalaryna oralyp,  maldary men múlikterin ákelýi qajet.

-  Baǵalaý ótkennen keıin biz taǵy kelemiz. Jınalyp, áńgimelesetin bolamyz. Sheshilmeıtin másele bolmaıdy, bastysy – abyrjymaý, úreılenbeý kerek. Barlyǵy jaqsy bolady, - dedi Qumar Aqsaqalov.

Sapar sońynda oblys ákimi  barlyq kóshelermen júrip, sý tasqyny soltústik qazaqstandyqtarǵa qandaı qasiret ákelgendigin baıqady.