HQKO-da jańa qyzmet kórsetý túri paıda boldy

    Assem Almuhanbet
    HQKO-da jańa qyzmet kórsetý túri paıda boldy

    Búgin Astana qalasy Esil aýdanynyń №1 Halyqqa qyzmet kórsetý ortalyǵynda, QR eńbek jáne halyqty áleýmettik qorǵaý vıse-mınıstri S.Jaqypova, zeınetaqy jáne áleýmettik tólemder taǵaıyndaýǵa azamattardan qujattar qabyldaý, jumyssyz jandardy tirkeý ári olardy ári qaraı eńbekpen qamtý máseleleri boıynsha keńes berý júrgiziletin áleýmettik qyzmetter kórsetýdiń jańa sektor jumysyn tanystyrdy dep habarlaıdy Qamshy aqparattyq agenttigi.

    «QR Eńbek jáne halyqty áleýmettik qorǵaý mınıstrliginiń bastamasymen jáne QR Aqparat jáne komýnıkasıa mınıstrliginiń qoldaýymen, 1 sáýirden bastap, «Azamattarǵa arnalǵan úkimet» memlekettik korporasıasynyń halyqqa qyzmet kórsetý ortalyqtarynda azamattarǵa áleýmettik qyzmet kórsetýdiń jekelegen sektorlary óz jumysyna kiristi. Buǵan halyqqa kórsetiletin qyzmet sapasyn kóterý men HQKO mekemeleriniń kómegine júginetin adamdar leginiń kóp bolýy túrtki boldy. Atalǵan sektorlar ashylǵaly beri, el boıynsha ornalasqan HQKO qyzmetkerleri bazalyq zeınetaqy taǵaıyndaý, asyraýshysynan aıyrylý jaǵdaıyna, múgedektikke, bala týý men oǵan kútim jasaýǵa, jerleý rásimderine qajet, arnaýly járdemaqy syndy basqa da áleýmettik tólemder jóninde 42,5 myńnan astam adamnan qujattar qabyldap úlgerdi», - dep atap ótti Svetlana Jaqypova. 

     

    Vıse-mınıstr, sondaı-aq, jumyssyz jáne ózin ónimsiz jumyspen qamtyǵan azamattardy jumyspen qamtýǵa járdemdesýdiń belsendi sharalaryna tartý úshin 237 HQKO-da jumyspen qamtý ortalyqtarynyń mamandaryna 272 jumys orny uıymdastyrylǵanyn jetkizdi. Osylaısha, jumyssyz retinde tirkelgisi kelgen azamattar, 199 jumyspen qamtý ortalyǵynan tys, HQKO mekemelerinde de barlyq qajetti aqparatqa qanyǵyp, «Nátıjeli jumyspen qamtýdy jáne jappaı kásipkerlikti damytý» baǵdarlamasynyń qatysýshysy atana almaq.

     

    «Atap óterlik jaıt, jumysqa ornalasýda memleket kómegine muqtaj azamat, eń aldymen jumyssyz nemese ózin ónimsiz jumyspen qamtyǵan ekenin anyqtap alǵany abzal. Ár azamattyń áleýmettik mártebesin aıqyndaı otyryp, biz, jumyssyz nemese ózin ónimsiz jumyspen qamtyǵan jandardy jumyspen qamtýdyń belsendi sharalaryna tartýdyń naqty áreketterin atqarýǵa kúsh salamyz. Sonymen birge, memleket «Mindetti áleýmettik medısınalyq saqtandyrý» qoryna jarna aýdaratyn adamdar sanyn aıqyndaýǵa múmkindik beredi. Bizdiń mınıstrlik jeke sáıkestendirý nómiri arqyly jeke tulǵalar deregine arnalǵan memlekettik bazada tirkelgen el halqyn barlyq memlekettik organdardyń aqparattyq júıelerimen tolyq salystyryp shyqty. Qazirgi kezde, óńirlerde, úı-úıdi aralaý jolymen azamattardyń mártebesin naqtylaý jumysy belsendi júrgizilýde. Jumyssyz jandar ózdigimen jumyspen qamtý ortalyqtarynda, HQKO-da turǵylyqty jeri boıynsha aýyldyq okrýg ákiminde, «Qazposhta» AQ bólimshesinde nemese «elektrondyq úkimet» portaly arqyly tirkele alady», - dep túsindirdi vıse-mınıstr.

     

    Aǵymdaǵy aıdyn basynan beri, jumys tabýǵa baılanysty máselelermen elordalyq HQKO mekemelerine 464 adam kelse, onyń 229-na jumysqa ornalasýǵa joldama berilgen. 

     

     

    Qatysty Maqalalar