«Habar» arnasynda Mıhaıl Dorofeev júrgizetin «Ashyq suhbat» baǵdarlamasynda QR Aqparat jáne komýnıkasıa mınıstri Dáýren Abaevpen suhbat boldy. Ár aptanyń ózekti máselelerin talqylaıtyn baǵdarlamadaǵy suhbat bul joly eldegi sý tasqyny, EKSPO kórmesi qarsyńyndaǵy keleńsizdikter, revalvasıa máseleleri jaıynda órbidi.
Eń birinshi máselede elimizdiń birneshe aımaqtaryn sý basyp, saldarynan turǵyndar baspanasyz qaldy. Birneshe jyldardan beri kútpegen sý tasqyny qarapaıym halyqty eseńgiretip tastady. Boılaryn úreı bılegen halyqtyń qorqynyshyn endi kim seıiltpek? Shyǵyndar ótele me? Kelesi jyly sý tasqynynyń qaıtalanbasyna kim kepil? Osy másele týrasynda Dáýren Abaev óz oıymen bólisti.
«Tótenshe jaǵdaılar Komıtetiniń burynǵy basshysy Vladımır Bojko bylaı degen: «2004 jyldyń ózinde osy jylǵy tasqynnan qaraǵanda sý aǵyny 50 paıyzǵa kem bolǵan». Iá, bul jolǵy sý tasqyny úlken shyǵyn alyp keldi. Adamdar bılikti bul oqıǵaǵa beıjaı qarap otyr otyr dep oılaıdy. Bul pikirdiń qate ekenin aıtqym keledi. Tótenshe jaǵdaı qyzmetkerleri aýyl demeı, qala demeı, kúni-túni, saǵat saıyn, mınýt saıyn adamdarǵa kómek kórsetý úshin talmaı-tynbaı eńbektenip júr. Mıllıon kýbometr sý tazalandy, ýaqytsha bógetter quryldy, alaıda adamdardy tolǵandyratyn másele – ótemaqy. Turýǵa jaramsyz úılerimizdiń ornyn qalaı keltiremiz deıdi? Ol jaǵynan da bılik áreketsiz emes. Aldymen sý basqan jerdiń kólemin anyqtaýymyz qajet, sodan keıin báriniń shyǵyny óteledi. Memleket halyqty qaraýsyz qaldyrmaıdy», dedi QR Aqparat jáne komýnıkasıa mınıstri.
Onymen qosa, Dáýren Abaev zardap shekken turǵyndarǵa kómektesý úshin aptalap úı betin kórmeı júrgen eriktilerdi erekshe atap ótti, olarǵa alǵysyn bildirdi.
Sondaı-aq, halyqtyń kókeıinde júrgen kelesi suraq – «Bizdi osyndaı jaǵdaıǵa dýshar etken kináliler jazalana ma?». Aqparat tizginshisi bul suraqty da jaýapsyz qaldyrmady. Onyń aıtýynsha, qandaı jaǵdaı bolmasyn arnaıy tekserister júrgiziledi. Osy joly Atbasar kentine qatysty tergeý jumystary júrgizilip jatyr. Sebebi, aýylǵa byltyr ǵana berilgen bóget shydamaı jarylyp ketken.
Kelesi kezekte talqylanǵan másele – Astana qalasynda ótetin «EKSPO-2017» kórmesi. Kóktemniń bel ortasy boldy, kórmege daıyndyq qyzý júrip jatyr, alaıda halyq arasynda kórmege qatysty keleńsiz máseleler boı kóterip jatyr. Máselen, EKSPO-ǵa barý úshin muǵalimderge, jumysshylarǵa qınap bılet alǵyzyp jatqan kórinedi. Bılik shyn mánisinde osyndaı áreketterge baryp jatyr ma dep oılaısyń. Buǵan qatysty Dáýren Abaev bylaı dedi:
«Eshqandaı májbúrlik bolmaıdy. Múmkin keıbir jerlerde bar bolýy múmkin, alaıda májbúrlep bılet satqandar jazasyz qalmaıdy».
Budan bólek Dáýren Abaev EKSPO-ǵa kelýshilerdiń sany kóp bolatynyna senimdi. Onyń oıynsha, kórmege degen qyzyǵýshylyq halyq arasynda kún sanap artyp keledi. Jaqyn arada kórmeniń baǵdarlamasy daıyn bolady, ol baǵdarlamanyń tezirek shyǵýyn, tipti sheteldikterdiń ózi asyǵa kútip júrgen kórinedi.
EKSPO kórmesiniń bılet quny da eskerýsiz qalmady. Qarapaıym halyqtyń qaltasy kótere bermeıtindeı qymbat ekenin de aıta ketken jón. Deı turǵanmen, Dáýren Áskerbekuly kórmege qatysýdyń birneshe joldarymen bólisti: 6 jasqa deıingi balalar, múgedekter, soǵys ardagerleri t.b. tegin kiredi, sondaı-aq demeýshiler tarapynan da jeńildikter bar, máselen mektep oqýshylary úshin bılet qúny 50% jeńildikpen satylady.