Óńirlik komýnıkasıalar qyzmetinde ótken brıfıńte SQO ákimi Qumar Aqsaqalov BAQ ókilderin qalyptasqan sý tasqyny jaıly habardar eti dep habarlaıdy Qamshy aqparattyq agenttigi.
Oblys ákimi óńirdegi sý tasqyny jaǵdaıyn jeke baqylaýyna alyp, sol jaıly jýrnalıserdi kún saıyn aqparattandyryp otyrýǵa ýáde bergenin eske salamyz.
Tilshilerdiń saýaldaryna jaýap bere kelip, óńir basshysy sý tasqyny maýsymy aıaqtalǵannan keıin eldi mekenderdi sý basýynyń sebebin zertteý boıynsha saraptama jasalatyndyǵyn tilge tıek etti.
«Biz osy jumysty qolǵa alyp, árbir jaǵdaıǵa saraptama jasaǵaly otyrmyz. Olardyń árqaısysyna baǵa beriletin bolady, onyń ishinde zań júzinde de. Óziniń qyzmettik mindeti jaǵdaıynda osyǵan jol bergen adamdarǵa jaza qoldanylatyn bolady, ol úshin árbir jaǵdaı muqıat zertteledi jáne saraptalady»,- dedi Qumar Aqsaqalov.
Óńir basshysy joldardy sý shaıyp ketpeýi jáne buzbaýy úshin aýqymdy jumys júrgizilip jatqandyǵyn atap aıtty. Rýzaevka aýyly mańyndaǵy respýblıkalyq mańyzdaǵy «Astana-Petropavl» avtojolynyń jıegine balshyq úıilýde
«Petropavl mańyndaǵy joldarda keshe.boldym, «Ózen porty» aýmaǵyndaǵy 2,5 shaqyrymdaı jol bıiktetilýde. «Bylǵary zaýyty» kentindegi 2 qabatty úılerdiń eski bógetter ornalasqan oıpań jerlerine atalmysh eldi mekendi sý tasqynynan qorǵaý úshin bıiktetý jumystary júrgizilýde»,- dedi Qumar Aqsaqalov.
Oblys ákimi osy ýchaskedegi jumys Oıqalanyń 5280, Bylǵary zaýytynyń 3724 turǵynyn sý tasqynynan qorǵaý úshin jasalyp jatqanyn atap aıtty. Sonymen birge Zarechnyıdaǵy saıajaı ýchaskelerin sý basady dep kútilýde.
Petropavlda osy aýdandardyń turǵyndaryn qaýipsiz jerge kóshirý jáne sý tasqyny kezinde turýlary úshin №12,№13,№14 mektepterde jaıly oryndar ázirlenýde. Olar tósek-orynmen, qajetti azyq-túlikpen, medısınalyq qyzmetpen qamtamasyz etilgen. Budan basqa, tizim jasalyp, barlyq qart adamdar, júkti áıelder, múgedekter, 1 jasqa deıingi balalar baqylaýǵa alynǵan. Sorǵy stansıasyn qorǵaý maqsatynda birinshi kóterý stansıasy bekitildi.
«Ótirik aqparat taratqan adamdardy da tapqanymyzdy aıta ketkim keledi. Qazir qylmystyq tergeý júrgizilýde. Mundaı áreket qylmystyq jazaǵa tartylýǵa jatatyndyǵyn taǵy da eskerte ketkim keledi. Keshe aıtqanymdaı, qajetti taza sý qory bizde jetkilikti. Kerek bolǵan jaǵdaıda bizde 70 sý tasıtyn mashına ázir tur. Qajet bolǵan jaǵdaıda olardyń qalanyń qaı aýdanyna barý tetigin jasaıtyn bolamyz",- dedi óńir basshysy.
Qazirgi ýaqytta Petropavl qalasynda taza aýyz sý qory 16 myń tekshe metrdi, al shıki sý 11 myń tekshe metrdi quraıtyndyǵyn aıta ketken jón.