Mundaı aqparatty Óńirlik komýnıkasıalar qyzmetinde ótken brıfıń barysynda Din problemalaryn zertteý ortalyǵynyń josparlaý jáne uıymdastyrý bóliminiń basshysy Jaqypov Erzat Jasqanbaıuly habarlady dep jazady Qamshy aqparattyq agenttigi.
Erzat Jasqanbaıuly aqparatynsha, ekpe jasaý qanshalyqty paıdaly degen suraq, qazirgi tańda eń kóp talqylanyp jatqan másele desek te bolady. Ekpe jasaý durys emes deıtinderdiń biraz bóligi, bul qarsylyǵy sharıǵatpen tikeleı qatysy baryn aıtady. Sondaı qarsy taraptyń kóp qoldanatyn urandarynyń biri: - «Islam ekpe jasatýǵa tıym salady», «Ekpe jasatý - taǵdyrǵa qarsy shyǵý», «Vaksınasıa shaıtannyń zári» jáne t.b. Al, medısına salasynyń mamandary ǵylymı tájirıbelerge súıenip, ekpe jasatý durys ári qajetti sharýa deıdi.
Qasıetti Quranda hám paıǵambarymyzdyń súnnetinde vaksınasıaǵa anyq tyıym salynbaǵan. Kerisinshe, aýrýmen kúresýdiń bul tásilin qoldaǵan kóptegen dálelderdi tabýǵa bolady.
Quran men paıǵambar súnnetinde – aýrýdyń aldyn alýǵa qatty kóńil bólgen. Medısına ǵylymyndaǵy sońǵy jetistikter talaı jylǵy tájirıbeniń arqasy ǵana emes, bul Allanyń óz quldaryna jasaǵan qamqorlyǵy: «Eger men aýyrsam, (Alla) meni aýrýdan aıyqtyrady...» (Quran 26:80).
Imam Mýslımnen jetken hadıste Paıǵambarymyz (s.ǵ.s.) bylaı dep aıtty: «Barlyq aýrýǵa dári bar. Dári aýrýǵa sáıkes kelse, jaratýshynyń ámirimen ol kisi aıyǵady». Osyny alǵa tarta otyryp Mýslım «Paıǵambarymyz (s.ǵ.s.) aýrýdan emdelýge dárini qoldanýǵa ruqsat bergen deıdi.
«Qandaı da bir jerde juqpaly aýrý tarady degendi estiseńder, ol jaqqa barmańdar. Eger oba aýrýy sender turǵan jerde taraı bastasa, ol jerden ketpeńder». Bulhadıste «aýrýdan abaıla jáne aýrý basqa jaqqa taralyp ketpesin!» degen eskertýler jatyr.
Halyqqa ekpe jasaýǵa birneshe jyl kedergi jasalsa, juqpaly aýrýlar úlken bir aýmaqtarǵa taralyp ketedi. Jappaı ımmýnızasıa jasaý, kedeı, turǵylyqty jeri onsha jaqsy emes aýmaqtar úshin de jaqsy nátıje kórsetip jatyr. Ekpeniń paıdasy bir sózben aıtqanda ushan teńiz.
Ekpe – ǵalymdar men medısına qyzmetkerleriniń birneshe ǵasyr boıy izdep, tapqan dárisi. Men kúlli oblys turǵyndardy arandatýǵa ermeýdi, vaksınasıa jasaýǵa qarsy bolmaýǵa shaqyramyn, - dep baıandamasyn túıindedi Erzat Jasqanbaıuly.