Memleket basshysy jospardan tys jumys sapary barysynda elordanyń oń jaǵalaýyndaǵy temirjol vokzalynyń qyzmetimen tanysyp, vokzal mańyndaǵy alańda qala qonaqtarymen, turǵyndarmen kezdesti dep habarlaıdy Qamshy aqparattyq agenttigi Aqordaǵa silteme jasaı otyryp.

Nursultan Nazarbaev «Saryarqa» aýdanynyń turǵyndarymen áńgimelesip, olarǵa tabys pen baq-bereke tiledi, sondaı-aq qalanyń komýnaldyq sharýashylyq salasy qyzmetiniń jumysy týraly oılaryn tyńdady.

– Men jas maman retinde 10 jylǵa jýyq páter kezeginde turdym. Qazir zaman basqa. Umtylyssyz eshteńege qol jetpeıdi. Tabysqa jetý úshin jatpaı-turmaı jumys isteý qajet, sonda ǵana eńbektiń jemisin tata alasyzdar, – dedi Elbasy «Saryarqa» aýdanyndaǵy turǵyn úı kesheniniń biriniń turǵyndarymen áńgimelesý barysynda.

Qazaqstan Prezıdenti qalanyń qysqy maýsymnan keıingi jaǵdaıynyń jaqsy ekenine toqtalyp, shahardyń qyzmet kórsetý mekemeleri jumysynyń nátıjelerin jáne elordany abattandyrý, tazalyqty saqtaý jumystaryn jalǵastyrý qajettigin atap ótti.

Memleket basshysy avtomobıl joldaryndaǵy keptelis problemalary men kólik qoıatyn oryndardyń jetispeýshiligine nazar aýdardy.

– Joldarda kólik óte kóp. Qala basshylyǵy bul máseleni sheshýdiń joldaryn qarastyrýy kerek. Qajet bolǵan jaǵdaıda, sheteldik tájirıbe zerttelýge tıis. Sonymen qatar túrli ǵımarattardyń, saýda úıleri men dúkenderdiń ıeleri áriptesterimen birlesip, óz aýmaǵyndaǵy tazalyq pen tártipti qamtamasyz etýi qajet, – dedi Elbasy.

Nursultan Nazarbaev qalanyń «EKSPO-2017» halyqaralyq kórmesine ýaqtyly daıyndyǵynyń mańyzdylyǵyn aıtyp, barlyq turǵyndardy elordany kógaldandyrý isine belsene atsalysýǵa shaqyrdy.