31 arnanyń bergen aqparatyna súıensek, Astana zalynyń kúzetshisi Araı Temirhanova esimdi tilshiniń betinen shapalaqpen berip jibergen. Telearnanyń jańalyqtar qyzmetindegi dırektory Gúljan Muqysheva bolǵan janjalǵa baılanysty óz pikirin bildirdi:
«Bizdiń jýrnalıser ol jerde halyqtyń bir-birin ıterip, qysylysyp turǵanyn kórgen. Sóıtip, olar belgisiz bireýdiń telefonmen vıdeoǵa túsirip júrgenin baıqaǵan. Osy sátte onyń janyna kúzetshi jetip baryp, jigitke tap beredi. Muny kórgen jýrnalıs kúzetshini toqtatpaq bolady. Meniń túsinýimshe, janjal osydan bastalǵan» dedi Gúljan Muqysheva.
Sol sátte telearananyń astanalyq tilshisi Araı Temirhanova kúzetshiniń dórekiligin óz telefonyna túsirmekshi bolady.
«Bizdiń Araıdyń túsirmeske amaly qalmady. Ony baıqaǵan bir kúzetshi betinen uryp jibergen. Ol kúzetshilerdiń ishindegi eń belsendisi ǵoı deımin. Operator túsirmedi, sebebi tehnıkany saqtaý kerek qoı» dep sózin jalǵady.
Gúljan Muqyshevanyń sózine qaraǵanda, olar istiń mánin áli de anyqtaıtyn bolady. Ol jerde 31 arnanyń taǵy bir jýrnalısi bolǵan. Ol konsertte Dımashty halyqtyń qalaı qarsy alatyny jaıynda aıtyp, tikeleı efırge shyǵý kerek bolǵan. Al Araı jalǵasyn túsirmekshi, alaıda jaǵdaı múldem basqasha bolady.
Araıǵa kómektespek bolǵan ózge de tilshiler kúzetshiniń soqqysynyń astynda qalǵan.
Dımashtyń konsertinde oryn alǵan janjal jaıynda Mádenıet jáne sport mınıstri Arystanbek Muhamedıuly pikirin aıtty. Ol óz sózinde bolǵan jaǵdaıǵa jýrnalıserdi kinálap qaldy.
Arystanbek Muhamedıuly oqıǵany óz kózimen kórmegendikten eshteńe deı almaıtynyn aıtty. Tek oryn alatyn keleńsiz jaǵdaılardyń bárine mınıstr jýrnalıserdi kinálady. Sebebi, olarǵa tek ósek kerek eken, pıar izdeıdi eken. "Bulaı bolmasa, jýrnalısiń mansaby óspeıdi" deıdi.
Sondaı-aq, eshqandaı tergeýdiń bolmaıtynyn aıtty.
«Dımash – ańyz adam! Onyń qurmetine tý kóterildi, ánuran aıtyldy. Sondyqtan, eshqandaı tergeý bolmaıdy, tek pikirler aıtylady" dep sózin túıindedi QR Mádenıet jáne sport mınıstri.