Ózindik bitim-bolmysymen tyńdarmen júregine jol tartyp, án súıer jurttyń jadynda jattalyp qalatyn áýender kóp emes. Osyndaı ánderdiń biri Qytaıdaǵy qandastarymyzdyń qyz-bozbalasy túgel jatqa biletin «Qaıran qara burymdym» áni.

«Qaıran qara burymdym»  - konservatorıanyń esigin ashpaǵan, tipti nota tanymaıtyn, Úrimji ońtústigindegi taý baýraıynda qoı baǵyp júrip-aq shyǵara salǵan qazaq balasynyń áni.

Án avtory - óz ortasynda tanymal aqyn Ardaq Oshanuly. Atalmysh ándi júregi súıgen arýǵa arnap shyǵarǵan. Avtor bul ándi bala mahabbattyń, súıgen, súıdirgen qyzdardyń maǵan jáne halyqqa syılaǵan saýǵasy dep esepteıdi. Án - lap etip janyp, jyraqqa alystaı bergen mahabbat keıipkerine degen júrektiń  kirshiksiz syry.

Atalmysh ánge baılanysty Ardaq Oshanuly: ««Mahabbat qyzyq mol jyldarymnyń» qaıǵy men qýanyshy, kúlkisi men kúrsinisi, saǵynyshy men armany syndy án - júregimdi tynymsyz týlatyp, sana sezimimdi san terbeliske salyp, jastyǵymnyń jyǵylmas jalaýyndaı boldy», - deıdi. – «Án jazyldy, aıtyldy, esh jarnamasyz taralyp ketti. Kóz tanys qyzdar: «án maǵan arnalǵan» dep ózara «talasyp» júrgenin de estidim. Ónerdi súıgen halyqqa, sol qyzdarǵa úlken alǵys bildiremin, mahabbatym da baıaǵydaı», - deıdi án avtory. Ónersúıer qaýymnyń nazaryna «Qaıran qara burymdym» ánin usynamyz.

 (Oryndaǵan: Janat Nursultan)

Ańsap alystan,

     alǵash tanysqan,

     qos qaıyńnyń túbinde.

Janym eljirep,

     jasym móldirep

    turmyn kútip bul kúnde.

Jyraqtadyń sen,

     jylap qaldym men,

     móldir jaspen jýyndym.

Meni alǵash súıgen,

     otyma kúıgen,

     Qaıran qara burymdym.

Esimde sóziń,

    jalyndy júziń,

    ótse daǵy jyl aýnap.

Ketip eń sonda,

    jaýlyǵyń qolda,

    burymdaryń bulańdap.

Estilse ánim,

     esińe al janym,

     syryn uqshy muńymnyń.

Umytpa meni,

    júrektiń emi,

    Qaıran qara burymdym.

Aıyrylyp kettim dep,

    taǵdyrǵa ókpelep,

    meni oılaýmen júrsiń be.

Birge ótem dep,

    seni jetelep,

    júrýshi edim túsimde.

Qosylmaı ketken,

    jylaýmen ótken,

   armandynyń birimin.

Qonbaǵan baǵym,

    atpaǵan tańym,

    Qaıran qara burymdym.

Daıyndaǵan: Erlan Tóleýbaı.