Óz isine adal kásipker memlekettiń, baspasóz ben qoǵamnyń erekshe nazarynda bolýy kerek
«Atameken» QR Ulttyq kásipkerler palatasynyń Tóralqa Tóraǵasy Tımýr Qulybaev jumys saparymen Almaty oblysyndaǵy kásiporyndarǵa baryp, óńir máselelerin talqylaý úshin kásipkerlermen kezdesti. Tóralqa Tóraǵasy Taldyqorǵanda oblys ákimi Amandyq Batalov, Óńirlik keńes músheleri, quqyq qorǵaý organdarynyń basshylary, bıznes-qaýymdastyqtar, bankter men qarjylyq ınstıtýttardyń ókilderi jáne taýar óndirýshilerdiń qatysýymen keńeıtilgen jıyn ótkizdi.
Ulttyq palata basshysy óz sózinde isin adal atqaryp otyrǵan kásipkerler memlekettiń qamqorlyǵynda bolýy kerek ekenin atap ótti.
«Biz QR Bas prokýratýrasymen memlekettik organdardyń baqylaý-qadaǵalaý qyzmetin azaıtýǵa qatysty mańyzdy jumysty jalǵastyramyz. Kásipkerge qatysty júrgiziletin 28 myń baqylaý-qadaǵalaý qyzmetiniń úshten eki bóligi qysqartylady, qalǵany, bıznes múddesine ákimshiliktendiriledi. Biz adal kásipkerdiń memlekettik saıasattyń ortasynda bolǵanyn qalaımyz. Adal kásipker memlekettiń qamqorlyǵyna alynýy kerek. Mundaı kásipkerge baspasózdiń de, qoǵamnyń da aıryqsha nazary aýdarylýy tıis», – dedi Tımýr Qulybaev.
Ulttyq palata Tóralqa Tóraǵasy Elbasynyń qoldaýymen «Atameken» UKP adal kásipkerlerdiń bıznesti júrgizýine ońtaıly jaǵdaıdy qamtamasyz etý úshin jáne shaǵyn jáne orta bıznesten túsetin salyq aýdarymdarynyń bóligi sol óńirde qalý úshin qoldanystaǵy Salyq kodeksine ózgertý engizýge qatysty jumysty qarqyndy júrgizip jatqanyn aıtty. Bul tıisinshe jergilikti bılikti bıznesti damytýǵa jaǵdaı jasaýǵa yntalandyrady.
«Biz salyq ákimshiligine qatysty máseleler týyndaıtynyn kásipkerlerden keletin kóptegen ótinimnen baıqadyq. Kásipkerlerdi zańsyz tekserýlerden, salyq organdarynyń sotynda nemese basqa da sotta óz múddelerin qorǵaý qajettiliginen shekteý kerek. Osy maqsatta mınıstrlikterge óz usynystarymyzdy berdik. (...) Ulttyq palata saraptamalyq pikir bildirip, sotta qorǵaıdy jáne adal kásipkerlerdi qoldaý jumysyn jalǵastyra beredi», – dep naqtylady Tımýr Qulybaev.
Almaty oblysynda kásipkerliktiń 118 myń sýbektisi jumys isteıdi, onyń ishinde 97 myńy, ıaǵnı 82%-y aýyldyq jerde.
