Aýyzǵa túkirýdi medısına salasy quptamaıdy, dep  Qamshy aqparattyq agenttigi habarlaı otyryp, sábıdiń aýzyna túkirýdiń qaıdan shyqqany jaıly maqalany oqyrman qaýymǵa usynady. 

Úlken toılardyń birinde bir keıýana eki jasar nemeresin ákelip egde tartqan azamatqa: «Atasy-aı,myna nemeremniń aýzyna túkirshi, bul da sen sıaqty elge tanymal shejireshi bolar ma eken» dep sábıdiń qarsylyǵyna qaramastan, qarıanyń aldyna alyp keldi.

Shejireshi de balanyń eki betin eki alaqanymen qysyńqyrap turyp aýzyn ashty da, túkirip-túkirip jiberdi.

Men álgi qarttyń janynda onyń deminen temekiniń ıisi ańqyp turǵandyqtan, zorǵa shydap otyrǵanmyn.

Qarıa qyzmetin atqaryp boldy da: «Bul da ata-babadan kele jatqan óte jaqsy yrym ǵoı. Solaı emes pe?!» dep jan-jaǵyna kóńildi keıippen kóz tastady.

Birden sekem aldyrmas úshin ol kisini maıdalap sózge tarttym. Arasynda densaýlyǵy jaıly da qarapaıym suraǵymdy qoıdym. «Oı, nesin aıtasyń, mende jeti-segiz aýrýdyń túri bar. Kóbinese dári ishemin, dárim qaltamda júredi» dep dárilerin de kórsetti. «Bronhıt, artrıt, qan qysymy, búırek, taǵy basqa jerlerim aýyratyndyqtan dárigerdiń baqylaýyndamyn» dep shejireshi qarıa aǵynan jaryldy.

Men ol kisige jańa ǵana sábıdiń aýzyna túkirip bolyp bul da bir ata-babadan qalǵan jaqsy yrymdardyń biri ǵoı, solaı emes pe dep kópshilikke suraq berdińiz. Men muny quptamaımyn. Eger maǵan beıkúná sábıdiń aýzyna túkir dese túkirmes edim. Naýqastyń birneshe túri mende de bar. Ári temekini óte kóp shegedi ekensiz. Sábıdiń organızmine sizdiń túkirigińiz arqyly aýrý juǵýy múmkin. Túkirgenshe, balaǵa Alladan tilek tilep, duǵa jasap, batańyzdy bergenińiz óte jaqsy bolar edi. Sizdiń ornyńyzda bolsam, tap solaı eter edim. Sábıdiń túkirgen adamǵa uqsap jetilýi, jetilmeýi bir ǵana Allanyń quzyryndaǵy nárse.– dedim.

Qazaqta belgili tulǵalyq dárejege jetken azamatqa eline eleýli, halqyna tanymal azamat bolar ma eken dep sábıdiń aýzyna túkirtý degen bolǵan.

Paıǵambarymyz da (s.ǵ.s) óziniń aýzyndaǵy qurmasyn aýzyna salyp bir sábıge sorǵyzǵany baıandalǵan.

Ol–Allanyń súıikti elshisi, ári Paıǵambar ǵoı. Ol (s.ǵ.s) kúnde de, túnde de qulshylyǵyn jasap, namazdaryn oqyp, dáretin alyp júretin óte taza, únemi aýzynda duǵasy, erekshe qasıetke ıe adam ǵoı.

Al, álgi shejireshi qarıalar men biz sıaqtylarǵa ne joryq? Biz tek qana jer betindegi Allanyń quly, ári Paıǵambardyń (s.ǵ.s) kóp úmmetteriniń biri ǵanamyz.

Beıkúná sábılerdiń densaýlyǵyna zıanymyzdy tıgizbeı, jaıymyzǵa qarap, óz jónimizben júrgenimiz durys sıaqty.

Muny medısına qyzmetkerleri de quptamaıdy. «Dástúrdiń ozyǵy bar, tozyǵy bar» dep jatamyz da, bireýlerge zıanymyzdy tıgizip júrgenimizdi ańǵara bermeıtin sıaqtymyz.

Oılanǵanymyz abzal, aǵaıyn!

Beganysh JAQSYBAEV