Islamdy jete túsine qoımaǵan kisiler kálıma shahadatty aıtsaq boldy, jumaqqa kiremiz dep oılaıdy. Al, sol kálımanyń qalaı aıtylýyna, ol sózderdi aıtqan soń, soǵan saı amal etýge kóptep kóńil bóle bermeıdi. Allany taný, ıslamdy qabyldap qana qoıýda emes, ony sezine bilýde, júrekpen, aqylmen, sanamen uǵyna bilýde bolsa kerek. Qıamette esep aldyna kelgende bir pendiniń amal dápteri qara paraqtarǵa tolyp ketken eken. Tipti kóziniń tusyna deıin jetipti álgi paraqtar. Onyń qolynda bir ǵana aq paraq bar eken. Onda «Lá ıláhá ıllAlla» kálımasy ǵana jazylypty. Álgi pende qorqyp, shoshyp tarazyǵa kelgende tarazynyń bir jaq beti, álgi qara qaǵazdarǵa tolyp, aýyr salmaqpen basyp tastaǵanyn kóredi. Tarazynyń ekinshi jaǵyna júreksine álgi bir qatar jazýy bar bir ǵana aq qaǵazdy qoıǵanda, paraqta jazylǵan «Lá ıláhá ıllAlla» sóziniń kúshtiligi aspanmen teńdeı turǵan qara paraqshalardy parsha-parsha etip shashyp jiberipti. Tarazyny aýyr tartqan paraqta jazylǵan «Lá ıláhá ıllAlla» sózi bolatyn. «Lá ıláhá ıllAlla» júrekten shyqsa, onda ol óz ornyn tabady. Jumaqqa alyp barady, Allanyń raqymyna bóletedi! Imam an-Naýaýı «ál-Azkar» kitabynda: «Lá ıláha ıllá-Llah» sózi eń jaqsy zikir bolyp tabylady, mine sondyqtan musylmandardyń úlken ǵulamalary bul sózdi izgilerdiń isin jalǵastyrýshylar úshin (salıhter), aqıqatty izdenýshiler (mýrıdter) jáne jalǵyz otyryp eske alýshylar (halýat) úshin tańdady. Olar bularǵa bul sózderdi árdaıym aıtyp júrýdi buıyrǵan jáne bylaı degen: «Shaıtannyń ýás-ýásynan eń jaqsy qorǵan Allany kóp eske alý bolyp tabylady».
Birde Ýahb ıbn Mýnabbıhten bir sahaba: «Lá ıláhá ıllAlla» degen sóz Jannattyń kilti emes pe?» - dep suraıdy. Ol: «Iá, biraq ár kilttiń tisteri bolady. Tisteri bar kilt qana esikti ashady. Tisteri bolmasa, ashylmaıdy», - dep, Allanyń birligine ıman keltirgennen keıin qulshylyq jasaýdyń qajetti ekenin bildirdi.
Osy keltirilgen mysaldarǵa súıene otyryp, barsha dinsúıer qaýymdy, eńsesin endi ǵana kóterip kele jatqan jas býyndy Allaǵa qulshylyq etýge shaqyramyz. Qulshylyq aýyzda emes, júrekte bolýy tıis. Allany tanýdaǵy amaldar ádetke aınalýy qajet. Ádet qanǵa sińip, qan júrekke barady. Al, amaldar qanǵa sińip ketse ǵana ol júrekke qonady. Qanǵa sińetin amaldarymyz ıgi bolýy úshin, ilim qajet. Tarazyny aýyr tartqyzyp, Jannattyń esigin ashqyzatyn kiltterińizt – «Lá ıláhá ıllAlla» kálımalaryńyz «tisti» bolsyn!
Avtory: Tóltaev Erbol
Sholýshy: Ásel Óteshova
