Túrkıanyń Antalıa qalasynda meshit ımamy 38 keli marıhýanamen ustaldy. 37 jastaǵy Djasım Lachınkaıaǵa 5 jyl 5 aı bas bostandyǵynan aıyrý jáne 10 myń lıra  (879  myń teńge) aqshalaı jaza kesildi dep habarlaıdy aktifhaber.com.

Jeltoqsan aıynda Antalıa qalasynda «jandy bomba» júr degen habarlama negizinde jergilikti polısıa kólikterdi tekserý barysynda ımam kóliginen 9 keli marıhýana taýyp alǵan. Imam jumys isteıtin meshit ornalasqan Hısarchandyr aýdanynda taǵy da 29 keli marıhýana bolǵan. Lachınkaıa jergilikti tártip saqshylaryna  esirtkiniń Alı Aslanbaı degen adamnyń múlki ekenin, óziniń tek paıdalanýshy bolǵanyn aıtqan. Imam bergen túsinikteme negizinde Alı Aslanbaıǵa 10 jyl 10 aı túrme jazasy berildi.

Al óz kezeginde Aslanbaı ımammen arasynda daý bar ekenin alǵa tarta otyryp, ózine jala jabylǵanyn aıtady. Sonymen qatar,  Konıa qalasynyń Selchýkly aımaǵynda uzaq jyldar boıy ımam qyzmetin atqaryp, artynan zeınetke shyqqannan keıin erikti túrde azan shaqyrý qyzmetin atqarǵan Y.Y. atty azamattyń aqsha berip, zına jasaǵany belgili boldy aktifhaber.com.

Eki áıeli (bireýi resmı nekede) jáne 6 balasy bar 60 jastaǵy Y.Y. aqshalaı kómekke muqtaj áıeldermen meshit ishinde jynystyq qatynasqa túsken. Haberturk agenttiginiń habarlamasynda: «Meshit qyzmetkeriniń ozbyrlyǵyn Quran kýrsynda oqyp júrgen balalardan bilgen. Meshit jamaǵatynan keıbir adamdar azan shaqyrýshynyń áıelderdi meshitke kirgizip jatqan tusyn uıaly telefondaryna túsirip alyp, mýftıatqa jetkizgen. Meshit qyzmetkeriniń zına jasaǵanyna kózi jetken mýftıat ony qyzmetinen bosatqan»,-delingen.

Meshitten qýylǵanyn moıyndaǵan Y.Y. : «Bul týraly eshteńe aıtqym kelmeıdi. Meshitke barmaǵanyma 1 aı boldy. Endi Ýmraǵa ketemin, bul máselelermen basymdy aýyrtqym kelmeıdi»,-dep jaýap qatqan.

Aıdyn Ospanov