«Adal eńbekpen mal izdemek – ol arly adamnyń isi» dep dana Abaı aıtqandaı rasynda da, adamzat paıda bolǵannan beri óziniń qajettiligin tek eńbek arqyly qamtamasyz etip keledi. Eńbek adamdy adaldyq, tabandylyq, jaýapkershilik sıaqty qasıetterge baýlyp ıgilikke jetkizedi. Osyndaı adamzat damýynyń ıgiligine qatysty Elbasymyz barshaǵa óziniń «Qazaqstannyń áleýmettik jańartylýy: Jalpyǵa ortaq Eńbek qoǵamyna qaraı 20 qadam» atty baǵdarlamasyn jarıa etti. Bul baǵdarlama qazaqstandyqtarǵa jańa serpin, jańa úmit syılaǵany anyq.
Baǵdarlama aıasynda qarastyrylǵan taqyryptar zamannyń ózekti máselelerine basa nazar aýdaryp, áleýmettik jańǵyrtý saıasatynyń negizine shynaıy óndiristik eńbekti qoıý mindeti artylǵan. «Bul – praktıkalyq, pragmatıkalyq ıdeıa. Ol maǵan tipti etene jaqyn, óıtkeni, men qazaqstandyqtar jaqsy biletindeı, ózimniń kásibı jolymdy «aq saýsaqtar» sekildi kabınette de, parkette de emes, jumysshy-metallýrg retinde bastadym. Al bul, atap aıtsam, naǵyz kásip bolyp tabylady!» degen Elbasynyń bul sózderinen jastardy eńbektiń túrli salasyn meńgerip, qıyndyqqa qaramastan eńbek jolyn óndiriste bastap, jumysshy maman bolýdan bas tartpaı, óz úlgisin mysal ete otyryp, jastardy qajyrly eńbek etýge shaqyrdy.
Básekege qabiletti ult bolyp qalyptasýda keıbir jastarymyzdyń psıhologıasynda qalyptasqan shetten tys qanaǵatshyldyq sezimi eńbek jolynda tabysty nátıjege qol jetkizý úshin tájirıbe jınaqtaýǵa, jańa maqsat-múddelerge, bolashaqqa talpynýǵa kedergi keltiredi. Kerisinshe, jastar eńbek etýde únemi jańa qarqynǵa, zamanaýı suranystarǵa saı bolyp otyrý maqsatynda óz-ózin únemi jetildirip, qamshylap otyrýy qajet. Buǵan Elbasynyń «Adam óziniń qaıda bet alǵandyǵyn anyq kórgen kezde ǵana bıikke qaraı kúsh-jigermen umtylady» degen sózderi dálel bola alady.
Árıne, naryqtyq ekonomıka zamanynda básekege qabiletti bolý úshin baǵdarlamada qarastyrylǵan bilim berý júıesin jańǵyrtý jónindegi qadamdarǵa jaýapkershilikpen qaraý mańyzdy. Baǵdarlama mazmunynda kórsetilgen áleýmettik jańǵyrtý jolyndaǵy maqsat-talaptar ıgi bastamanyń nyshanyn bildiredi. «Eńbek etseń erinbeı, toıady qarnyn tilenbeı» dep dana babalarymyz aıtqandaı, eńbek etý degenimiz - ómir súrý, óz talaptaryńdy qanaǵattandyrý bolsa, jastardy bilim ordalarynan bastap-aq eńbekke baýlý jáne eńbek etýde bilimniń alar ornyn aıqyndap kórsetý – bizdiń mindetimiz.
Qazirgi zamandaǵy ǵylym men tehnıkanyń jahandaný dáýirinde bilim alýdyń mańyzdylyǵyn tereń túsinip, teorıalyq bilimderin tájirıbede, ıaǵnı óndiriste júzege asyrý ár azamattan talap etilse, barlyq óndiris salasynda ozyq tehnologıalardy ıgerý arqyly elimiz naryqta beldi oryn alary anyq.
Sońǵy kezderi elimizde óndiristik mekemelerdiń jıi ashylýy halyqty jumys oryndarymen qamtamasyz ete alǵanymen, keı salalarda mamandardyń tapshylyǵy baıqalady. Rasynda da, bilim ordasyn jańa támamdaǵan keıbir jas mamandar birden bıik mansap pen joǵary jalaqyny qalaıtyny jasyryn emes. Biraq bul barlyq salada birdeı múmkin bola bermeıdi. Basty nazarda kásibı sheberlikti shyńdaý, bilikti maman retinde qalyptasý turýy tıis. Adal eńbekpen keletin eńbektiń jemisi berekeli, yrzyqqa toly bolatynyn eskerý qajet.
Elbasymyzdyń halyqqa arnaǵan atalmysh baǵdarlamasy aýqymdy mindetterdi qamtı otyryp, halqymyzdyń eńbekqorlyǵy men básekege qabilettiligin oıatýǵa úndeý bolary anyq.
Qalabaı G.B.
Qazaqstan Respýblıkasy Din isteri jáne azamattyq qoǵam mınıstrligi Din isteri komıteti Din máseleleri jónindegi ǵylymı-zertteý jáne taldaý ortalyǵy ǵylymı qyzmetkeri
