Redaksıamyzǵa Shyǵys Qazaqstan oblysy Kúrshim aýdany Aqjaılaý aýylynyń turǵyny Jaqypova Nazerke habarlasyp, Kúrshim aýdanynyń ákimshilik qyzmetkerleri qurmet taqtasyn jasaý úshin tyl ardagerleriniń úılerine kelip, olardy sýretke túsirgenin ol úshin 1000 teńge kóleminde aqsha alǵanyn aıtty. «Men tyl ardageri Jaqyp Seıitqalı Jumabaıulynyń kelini bolamyn. 9 mamyr qarsańynda Kúrshim aýdany ákimdiginiń qyzmetkerleri úıge kelip, qurmet taqtasyna tyl ardagerleriniń fotosyn iletinin, sol úshin atamyzdy fotoǵa túsirgisi keletinin aıtty. Sýretke túsirgeni úshin bizden 1000 teńge aldy. Men aqshaǵa bola qynjylyp otyrǵanym joq. Túsinbeıtinim, az ǵana qalǵan tyl ardagerlerine qurmet retinde ákimdik nege aqsha bólmeıdi?! Olardan nelikten aqsha alady? Bizge ǵana emes Kúrshim aýdanyndaǵy tyl ardageri bar birneshe úıden solaı aqsha aldy ǵoı» dep óz renishin bildirdi Jaqypova Nazerke.
Osyǵan baılanysty Kúrshim aýdanynyń ákimdigine habarlasyp mán-jaıdy bilgen edik. Kúrshim aýdanynyń İshki saıasat bóliminiń basshysy Qasymbaeva Araılym Seıithamzaqyzy tyl ardagerlerin fotoǵa túsirmegenin jáne sáıkesinshe turǵyndardan aqsha jınamaǵanyn aıtty. Alaıda Aqjaılaý aýyly Marqakól aýyldyq okrýgine qarasty bolǵandyqtan atalmysh isti solar uıymdastyrýy múmkin ekenin jetkizdi. «9 mamyr Jeńis kúnine oraı Kúrshim aýdany ákimdigi tyl ardagerlerine arnap is-shara jasady. Sharaǵa 100 tyl ardageri shaqyrtyldy. Alaıda olardy sýretke túsirip jáne ol úshin aqsha jınalmady» dedi Kúrshim aýdanynyń İshki saıasat bóliminiń basshysy. Qasymbaeva Araılym Seıithamzaqyzy Kúrshim aýdany Aqjaılaý aýylyna qarasty Marqakól aýyldyq okrýginiń ákimdigine habarlasyp, mán-jaıdy anyqtaıtynyn aıtty. Marqakól aýyldyq okrýgi ákimi apparatynyń jetekshi mamany Araı Baımýrzına ákimshilik aqsha jınamaǵanyn jáne ákimshiliktiń josparynda atalmysh jumys qarastyrylmaǵanyn jetkizgen.
«Marqakól aýyldyq okrýgi tyl ardagerlerine arnap qurmet taqtasyn jasaǵan. Oǵan tyl ardagerleriniń sýreti ilindi. Olardy sýretke túsirýge arnaıy fotograf barmaǵan jáne tyl ardagerlerinen 1000 teńge almaǵan.Jaqyp Seıitqalı Jumabaıulynyń sýretin kelini Jaqypova Nazerke áleýmettik jeli arqyly ákimshilik qyzmetkerlerine jiberdi» dedi Marqakól aýyldyq okrýgi ákimi apparatynyń jetekshi mamany Araı Baımýrzına. Jaqypova Nazerke ákimshilik qyzmetkerimiz dep úıine kelip, qyzmeti úshin 1000 teńge alǵan adamdardyń esimderin suramaǵanyn aıtady. Bul iste alaıaqtar paıda tabý úshin osyndaı quıtyrqy áreketke barýy múmkin degen boljam da bar.
Qamshyger: Aqnur MUHTARHAN
