Qaraǵandy Keńes odaǵynan qalǵan kertartpa ataýlardan aryla bastady. Qalada qazir kóshe attaryn aýystyrý naýqany bastalyp, jurttyń usynystary daýysqa salynyp jatyr. Alaıda, komýnıstik dáýirden beri kele jatqan alǵashqy tórt kósheniń ataýyn ózgertýge óńeshin jyrtyp qarsy shyǵatyndar bar eken. Bnews.kz-tiń jazýynsha, bul týraly KTK arnasy habarlaǵan. 

Qaraǵandydaǵy Shahtostroıtelnaıa jáne Oktábr revolúsıasynyń 40 jyldyǵy atyndaǵy kóshelerge Qaraǵandy óńirinde túrli basshylyq qyzmette bolǵan Sopyjan Áshláev pen batyr Raqymjan Qoshqarbaevtyń esimderin berý máselesi yń-shyńsyz qoldaý tapqan. Alaıda, Novoselov kóshesine Janqoja batyrdyń esimi usynylǵanda, álgi kóshe turǵyndarynyń tóbe shashtary tik turypty. Biri eski ataýǵa tıispeńder dese, ekinshileri Janqojanyń Qaraǵandyǵa sińirgen eńbegi joq dep týlaǵan. Arhıtektýrnaıa kóshesine usynylǵan Jaıaý Musa esimi de osynyń kebin kıip, biraz daý bolypty. Uzaq aıtys-tartystan soń zalǵa jınalǵan 70-ke tarta adamnyń basym daýysymen 4 kóshege usynylǵan jańa esimder maquldanyp, bekitilipti.  Biraq, qarasy sırek qarsy tarap, endi ataý ózgertý múldem doǵarylsyn degendi  aıtyp tarasypty.

Qamshy-aqparat