Reseı SİM baıandama jasap, NATO-nyń áskerı bazasy men qurylymdarynyń Grýzıada ornalastyrylýyna qatysty eskertý jasady. Bul týraly Iran Qazaq radıosy jazdy.

IRNA-nyń habarlaýynsha, Reseı SİM baıandamada sársenbi kúni Jenevada ótken Kavkaz aımaǵynyń qaýipsizdigi jaıly halyqaralyq kelissózderdiń taǵy bir kezeńi bolatyny jaıly aıtyp, sondaı-aq «NATO bazasynyń Grýzıada ornalastyrylýy Kavkaz aımaǵynyń qaýipsizdigi men turaqtylyǵy úshin qaýipti» dep eskertken. Reseı SİM-niń baıandamasyna sáıkes, Ońtústik Osetıa jáne Abhazıa delegasıalary da Jeneva kelissózderinde NATO-nyń Grýzıaǵa qatysty sońǵy jınalystarda qabyldaǵan sheshimderine toqtalyp, halyqaralyq kelisimniń bekitilýiniń qajettiligin basa aıtqan. Bul kelisimshart boıynsha Tbılısı Abhazıa men Ońtústik Osetıa aımaqtaryna qarsy kúsh qoldanbaýǵa mindetteledi. Jeneva kelissózderine Reseı, Amerıka, Grýzıa, Abhazıa men Ońtústik Osetıa ókilderi qatysty. Kelissózder BUU men Eýropanyń qaýipsizdik jáne yntymaqtastyq uıymynyń baqylaýymen ótti. Reseı tarapy osy otyrysta NATO-nyń Grýzıada áskerı baza men qurylymdardy ornatý jaıly sheshimine baılanysty alańdaýshylyq bildirdi.

Qamshy-aqparat