Ana degen ómirdegi jalǵyz shamshyraǵymyz, qazynamyz. Qasymyzda júrgen anamyzdyń qadirin kesh túsinip jatamyz, ókinishti. Ananyń qadirin túsindirip, sabaq beretin, ómirde bolǵan oqıǵany Qamshy aqparattyq agenttigi islam.kz-ke silteme jasaı otyryp oqyrman nazaryna usynady.
Poıyzda kelemin. Janymda otyrǵan qyryqtar shamasyndaǵy jolaýshy áıeldiń kóz jasy tyıylar emes. Solq-solq etip sharasyz keıipte jylaı berdi, jylaı berdi.
Birer ýaqyt ótken soń, sál basyldy. Sóıtip, janynda otyrǵan bir-birine múlde beıtanys úsheýmizge qarap bylaı dedi:
– Beıtanys baýyrlarym, jer betindegi ózge tiri jan bilmeıtin syrymdy sizderge aıtpasam, ishim kúıip, órtenip barady…
– Álbette, – desip, bas shulǵydyq.
– Kúıeýimmen jaraspaı, ajyrasyp, tórkinime qaıta keldim, – dep bastady ol sonda áńgimesin. – Ákem de, sheshem de janymda boldy. Sóıtip, kúıeýimnen bir balam bar, tórteýimiz tura bastadyq. Jumystyń qıyndyǵynan ba, bilmedim, áıteýir qabaǵym bir ashylmaıtyn. Kári áke-sheshem bar táttini aýzyma tosyp otyrǵanda da, ákem qaqyrynyp qalsa, jaqtyrmaı, aldymdaǵy tamaqty ıterip, tógip jiberetinmin. Anam sol kezde «Qarǵam-aı» deıtin de, tógilgen tamaqty únsiz jınap alatyn. Anam da, ákem de qartaıǵan… Júris-turystary qıyndaı bastaǵan shaqta, tipti «Qarttar úıine» tapsyryp tastasam ba eken dep te oılanyp júrdim. Óıtkeni, qatty sharshap kelgende ózimmen-ózim bolyp, rahattanyp demalǵym keletin. Olar úıge bir kirip, bir shyǵyp tym tynymsyzdanyp ketti.
Astanada jaqsy qyzmetke ornalasyp, sý jańa jıp aldym. Sol jıpke áke-sheshemdi mingizgim kelmeı, olardy barar jerine avtobýspen júrgizip qoıatynmyn. Myna ómirge me, qoǵamǵa ma, bilmedim, áıteýir keýdemde bir óshpes óshpendilik boldy. Bárin jek kórdim. Bárinen baz keshtim.
Týǵan baýyrymmen syıyspaı, ata-anamdy sol baýyrymnyń otbasymen aralastyrmadym. Anama da, ákeme de daýys kóterip, buıyra sóıleý kúndelikti daǵdyma aınaldy.
Keshe aıaq astynan anam júregi ustap qulap qaldy. Men jumysta edim.Tas bolyp qatyp qalǵan júregim kezekshi dárigerler aýrýhanadan qońyraý shalǵanda erip sala bergeni-aı… Alqynyp aýrýhanaǵa jettim.
Anam kereýette jatyr eken. Kózi jumýly. Kereýetke jetip jyǵylyp, ókire jyladym.
– Tastamashy, apa! Tastamashy! Meni keshirshi?! Keshirshi meni! Men qazir-aq baýyryma qońyraý shalamyn, baýyrymmen tatýlasamyn, barlyq jaǵdaıyńdy jasaımyn, tek kózińdi ashshy, – dep kóz jasymdy tóge berdim.
Anamnyń saýsaǵy ázer qımyldady. Biraq dáriger bul anamnyń ómirindegi sońǵy mınýttary ekenin aıtyp, «Sońǵy sózderińdi tez aıtyp qal» dep kúbirledi.
– Apa! Meni keshirseń, qolymdy qysshy! – dedim janushyra.
Bul sózderdi ne úshin aıtqanymdy bilmeımin. Bálkim ózime kishkene jeńil bolsyn dep, keıin óz-ózimdi jegideı jemes úshin aıtqan shyǵarmyn…
Anam qınala qımyldap, saýsaǵymen qolymdy bir ret qysqandaı boldy…
– Rasymen be? Men beıbaqty, men sorlyny keshiresiń be, apa?! – degenimde, birer sekýndtan soń, anam saýsaǵyn taǵy qımyldatty. Men bul joly anamnyń meni estip jatqanyna senimdi boldym.
Osydan keıin birer sekýndtan soń, anam máńgilik saparyna attanyp ketti. Men ebil-sebil bop jylap, anamnyń betin, saýsaǵyn súıe berdim. Buryn anam tiri kezinde meni betimnen súımekshi bop umtylǵanda, «Betińdegi ájimderiń betime tıgende jıirkenem» dep, súıgizbeıtinmin. Senesizder me, anam kereýette jatqanda, sondaı tátti bolyp ketti. Sondaı tátti edi… Ájimi de sondaı súıkimdi bolatyn…
Al jansyz saýsaqtary máńgilik menen ajyramasa eken dep tiledim sol sát. Biraq bári kesh edi… Kesh edi…
Men aqymaqty bir sátte ózgertip, táýbesine keltirgen qandaı qudiret ekenin bilmeımin. Bir bilerim – ómir boıy anama istegen isterim úshin ókinip ótemin…
Áıeldiń aýyr áńgimesin tyńdap otyrǵan jolaýshynyń biri:
– Al ákeń qaıda? – dedi sybyrlaı…
– Ákem anam qaıtys boldy degen habardy estigen boıda júregi ustap, qulap qaldy. Qazir aýrýhanada jatyr. Jaǵdaıy jaqsarypty, telefonmen sóılestim. Biz anamyzdy ózi týǵan Taldyqorǵanǵa jerleý úshin alyp kelemiz. Anamnyń múrdesi baýyrymnyń kóliginde, – dedi áıel.
Júıtkigen poıyzǵa júrdek ýaqyt ilesip, áp sátte tún túsip, bárimiz uıqyǵa jattyq. Áıel túnimen aýyr kúrsinip, dóńbekship shyqty.
Tańerteń turǵanda, áıel bir túnde birden on jasqa qartaıyp, shógip ketkendeı sezildi…
Qolymyzdy mezgilinen kesh sermep qalyp júrmeıik baýyrlar. Anańyzdy jaqsy kóretinińizdi aıtyp, jıi-jıi qushaqtap, betinen súıińiz.
Sholýshy: Ásel Óteshova
