Taıpalǵyrdyń tańdap minip táýirin,

Belshesinen keship júrip munaıdy,

Baqyt degen – baılyq bolsa, baýyrym,

Baılar nege jylaıdy?

Jannan emes, tánnen alyp jylýdy,

Tar tósekte esinen myń tanypty.

Baqyt degen – qushý bolsa sulýdy,

Júrgish nege jalyqty?

Asyp tur ǵoı as emes bul dańqy astyń,

Munysyna mıym jetpeı turǵany-aı.

Baqyt degen – araq bolsa,

Alqashtyń

Áni nege muńǵa baı?

Taqymyńyz taǵyńyzǵa tolsa eger,

Osy emes pe ómir súrý ómirsiz.

Baqyt degen – bastyq bolý bolsa eger,

Ákim nege kóńilsiz?!

Bazarshynyń bet-beınesin daýda kór,

Qaltasynan asyp-tasqan baılyǵy.

Baqyt degen – tabys bolsa,

Saýdager

Búgin nege qaıǵyly?

Dál men úshin joq eshqandaı quny túk,

Tanaýymen aspan súzgen kókeniń.

Barsha adamzat bara jatyr umytyp

Baqyt degen qanaǵatta ekenin.

Beıilderin qanaǵattan buryp qur,

Baqyt izdep sandalyp júr bar adam.

Baqyt bolyp dastarhanda kúlip tur

Qudaı bergen qara sý men qara nan!