Nursultan Nazarbaev Eýrazıalyq ekonomıkalyq odaq týraly shartty ratıfıkasıalaý týraly zańǵa qol qoıdy. Bul týraly Tengrinews.kz jańalyqtary Aqordaǵa silteme jasap habarlady.  

Ótken aptada bul qujatty Qazaqstan Parlamenti ratıfıkasıalaǵan bolatyn. Parlament palatalary qorytyndysynda Sharttyń Eýrazıalyq ekonomıkalyq odaqqa múshe memleketter halqynyń ómir súrý deńgeıin arttyrý múddesi úshin elder ekonomıkasynyń turaqty damýyna jaǵdaı jasaýǵa baǵyttalatyny aıtylǵan edi. Qujatty qabyldaǵan Belarýs Parlamenti bolsa el ekonomıkasyna yńǵaıly bir qatar talapty odaq shartyna engize bildi.

Ótken aptada Mınskide TMD memleketteri basshylarynyń kezdesýi barysynda Armenıanyń EAEO-ǵa qosylýy týraly kelisimshartqa qol qoıyldy. Búginde bul uıymǵa múshe bolýǵa Qyrǵyzstan ázirlenip jatyr.  Qazaqstan, Reseı men Belarýs osy jyldyń mamyr aıynda Astanada Eýrazıalyq ekonomıkalyq odaq týraly shartqa qol qoıǵan bolatyn. Ol 2015 jyldyń 1 qańtarynda kúshine enedi. 

Qamshy-aqparat