Búginde Almatydaǵy 89 kósheniń múldem ataýy joq. 165 kóshe esimderi eki ret qaıtalanǵan. Bul týraly  Almaty qalasy Tilderdi damytý, muraǵat jáne qujattama bóliminiń basshysy Qalabaı Ótepbergen málimdegen.

 «Almaty qalasynda 1848 kóshe bar. Oblystan Almatyǵa qosylǵan eldi mekenderdiń esebinen qalamyzda 165 kóshe ataýy qaıtalanyp ketedi. Al tarıhı eskirgen kósheler búgingi tańda 50-ge jetip otyr. Jaqynda prezıdenttiń jarlyǵymen 16 sáýirde Almaty qalasyna taǵy da 23 200 ga jer qosyldy. Ol jerde 27 eldi meken bolatyn bolsa, qazirgi tańda qalaǵa qosylǵannan keıin olar shaǵyn aýdan bolyp aýysady. Atalmysh eldi mekenderde 325 kóshe anyqtaldy. Bul jerlerde ornalasqan kóshe ataýlary da qalamyzdaǵy ataýlardy qaıtalap otyr», - degen Qalabaı Ótepbergen.

«Almaty» telearnasynyń habaryna saı, 2013 jyly 21 qańtarda osy onomastıka máselesine baılanysty zańnamalyq aktilerge ózgertýler men tolyqtyrýlar engizildi. Sol zańnamalyq aktilerdiń negizinde qalada qaıtalanatyn birqatar kóshelerdiń ataýlary qaıta qarastyrylmaq. Bul týraly Qalabaı Ótepbergen: «Biz zańnamalyq aktilerdiń negizinde máslıhattyń turaqty komısıasyna hat joldadyq. Hat qaralǵannan keıin Almaty qalasy ákimshiliginiń janyndaǵy onomastıkalyq komısıaǵa beriledi. Ol jaqtan qoldaý tapqannan keıin QR Úkimet janyndaǵy onomastıkalyq komısıaǵa kelisim alý úshin jiberiledi. Tıisti mekemelerden, qoldaý alǵannan keıin qalamyzdaǵy kóshelerdiń attary ózgertiledi», - deıdi.

Qamshy-aqparat