Ábý Saǵıd ál-Hýdrıden (Alla oǵan razy bolsyn) jetken hadıste: «Birde Paıǵambar(Oǵan Allanyń salaýatymen sálemi bolsyn) meshitke kirgen kezde aqsıa kúlip otyrǵan adamdardy kórip: «Lázzat pen dúnıege qushtarlyqty joıýshyny (ólimdi) jıi eske alyńdar! Sebebi qabir adam balasyna ár ýaqyt: «Men beıtanystar mekenimin, men jalǵyzdar mekenimin, topyraq mekenimin, qurt-qumyrsqalar mekenimin», – deıdi dep jazady Qamshy aqparattyq agenttigi mazhab.kz-ke silteme jasaı otyryp. Múmin pende jerlengen kezde kór oǵan: «Meniń ústimde ómir súrgenderdiń ishinde ózime qatty unaǵan jandardyń qatarynan ediń, hosh keldiń, búgin maǵan keldiń jáne qoınyma endiń, saǵan endi ne isteıtinimdi kóresiń» deıdi. Sóıtip kózi jetken jerge deıin qabiri keńeıtilip, oǵan jannatqa qaraı esik ashylady...
Al eger kúnákar jaman adam nemese kápir jerlense, oǵan qabir: «Saǵan «hosh keldiń» dep aıtpaımyn, meniń ústimde ómir súretin pendelerdiń arasyndaǵy eń jek kóretinderimniń biri ediń, endi búgin maǵan keldiń jáne qoınyma endiń, endi saǵan meniń ne isteıtinimdi kóresiń» deıdi. Sóıtip qabirdiń eki jaǵy syǵylyp, dene músheleri bir-birine jabysyp, qabyrǵalary aıqasady», – deıdi, sosyn Paıǵambar(Oǵan Allanyń salaýatymen sálemi bolsyn) saýsaqtaryn bir-birine aıqastyryp: «Ony Alla jetpis ýly jylanmen baılaıdy. Eger sol jylandardyń bireýi jerge qaraı demin jiberse, eshteńe óspes edi ári dúnıede eshteńe qalmas edi, onymen ábden esep aıyrysqansha olar ony shaǵyp azaptaıdy...», – dedi», – degen.
Sóıtip Ábý Saǵıd ál-Hýdrı sózin jalǵastyryp: «Paıǵambar(Oǵan Allanyń salaýatymen sálemi bolsyn): «Rasynda, qabir jannattyń baýbaqshalarynan bir baqsha nemese tozaq shuńqyrlarynan bir shuńqyr», – dedi», – degen.
Ábý Hýraıra (Alla oǵan razy bolsyn): «Paıǵambarmen(Oǵan Allanyń salaýatymen sálemi bolsyn) birge janazaǵa qatystyq, beıitterdiń janynda otyryp Paıǵambar(Oǵan Allanyń salaýatymen sálemi bolsyn): «Osy kórge kirisimen, kór: «Eı, adam balasy! Meni qalaı umyttyń?! Meniń jalǵyzdyqtyń, tylsym syr men qorqynyshtyń mekeni ekenimdi bilmediń be? Qurt-qumyrsqalar men sýyq topyraqtyń mekenimin, tek qana Alla keńitkenderge ǵana keńmin ári jaqsymyn» dep, sóıleıdi», – dep, sodan keıin Paıǵambar(Oǵan Allanyń salaýatymen sálemi bolsyn) sózin ary qaraı jalǵastyryp: «Qabir jannattyń baý-baqshalarynan bir baqsha nemese tozaq shuńqyrlarynan bir shuńqyr», – dedi», – degen.
Sholýshy: Ásel Óteshova
